Eron Hormuz boʻgʻozini ayrim davlatlar uchun ochdi
Bu Rossiya, Xitoy, Hindiston, Iroq va Pokiston kabi davlatlarni oʻz ichiga oladi. Ular Eronga "doʻstona davlat" sifatida koʻriladi.
Eron Hormuz boʻgʻozini ochdi, lekin bu hamma davlatlar uchun emas.
Eron islom respublikasi doʻstona mamlakatlar kemalarining Hormuz boʻgʻozidan oʻtishiga ruxsat berdi. Bu haqda Tasnim agentligi tashqi ishlar vaziri Abbos Aragʻchiga asoslanib maʼlum qildi.
Bu Rossiya, Xitoy, Hindiston, Iroq va Pokiston kabi davlatlarni oʻz ichiga oladi.
"Biz Hormuz boʻgʻozi orqali doʻstona deb hisoblagan bir nechta mamlakatlarga oʻtishga ruxsat berdik. Biz dushmanlarimizga boʻgʻozdan foydalanishga ruxsat berish uchun hech qanday sabab koʻrmayapmiz", dedi Aragʻchi.
Reuters agentligining xabar berishicha, avvalroq Eron rasmiylari BMT Xavfsizlik Kengashi va Xalqaro dengiz tashkilotiga tegishli bildirishnoma yuborgan edi.
Unda aytilishicha, dushman boʻlmagan kemalar, jumladan, xorijiy kemalar ham, agar ular Eronga qarshi tajovuz qilmasa va xavfsizlik talablariga rioya qilsalar, Hormuz boʻgʻozidan foydalanishlari mumkin. Bunday oʻtish Eron rasmiylarining roziligi bilan amalga oshiriladi.
Shu bilan birga, Tehron yana bir muhim yoʻnalish — Bab el-Mandeb boʻgʻozi ham tahdid ostida boʻlishi mumkinligiga ishora qildi. Eron quruqlikdagi bosqin boʻlgan taqdirda uni yopishga tayyor.
"Bob el-Mandeb boʻgʻozi dunyodagi eng strategik ahamiyatga ega boʻgʻozlardan biri hisoblanadi va Eron unga juda real tahdid solish uchun ham iroda, ham imkoniyatga ega. Shuning uchun, agar amerikaliklar Hormuz boʻgʻozi muammosiga ahmoqona yechim topmoqchi boʻlsalar, muammolari va ahvoliga yana bir boʻgʻoz qoʻshmaslikka ehtiyot boʻlishlari kerak", dedi harbiy manba Tasnim axborot agentligiga.
