Tojikiston prezidenti Oʻzbekistonga kelishi kutilyapti
23-29 mart kunlari esa madaniy aloqalarni mustahkamlash va tajriba almashishga bagʻishlangan "Tojikiston madaniyati va kinosi kunlari" boʻlib oʻtadi.
Tojikiston prezidenti Imomali Rahmon Oʻzbekistonga kelishi kutilyapti.
Ikki oʻrtada oliy darajadagi uchrashuvlar va muzokaralar boʻlib oʻtadi.
Shuningdek, 23-29 mart kunlari Toshkent va Samarqandda Oʻzbekiston va Tojikiston oʻrtasidagi madaniy aloqalarni mustahkamlash va tajriba almashishga bagʻishlangan "Tojikiston madaniyati va kinosi kunlari" boʻlib oʻtadi.
Tadbirlar doirasida uch avlod uchrashuvlari va yozuvchilar, shoirlar, rassomlar va ziyolilar adabiy va madaniy meros hamda ikki tomonlama hamkorlik istiqbollarini muhokama qiladigan "Navroʻzi olam" davra suhbatlari boʻlib oʻtadi.
"Tojik kinosi kunlari" dasturi doirasida "Qamoqdagi baliq", "Haqiqat izida", "Hayot goʻzal" va "Joʻra sarkor" kabi badiiy filmlar namoyishi oʻtkaziladi.
Bundan tashqari, Oʻzbekiston va Tojikiston rassomlari ishtirokidagi "Doʻstlik oqshomi" gala-konserti, Tojikiston ijodiy guruhlarining chiqishlari, tasviriy sanʼat koʻrgazmalari va teatrlashtirilgan tomoshalar rejalashtirilgan.
