Qashqadaryoda hokim yordamchisi va yetakchi mutaxassis qoʻlga olindi

Hokim yordamchisi va yetakchi mutaxassisga nisbatan jinoyat ishi qoʻzgʻatildi.

Korrupsiyaga qarshi kurashish yoʻnalishida Davlat xavfsizlik xizmatining Qashqadaryo viloyati boʻyicha boshqarmasi hamda Iqtisodiy jinoyatlarga qarshi kurashish departamenti xodimlari tomonidan tezkor tadbir oʻtkazilgan.

Unda Qarshi shahridagi mahalla fuqarolar yigʻinlaridan birida hokim yordamchisi lavozimida ishlovchi shaxs 1983 y.t. fuqaroga 2019 yilda shahar hokimligi tomonidan ijara shartnomasi asosida berilgan davlat zaxirasidagi 35 sotix yer maydonini mansabdor tanishlari orqali xususiy mulk sifatida rasmiylashtirib berish evaziga 1000 AQSh dollari olgan vaqtida ushlandi.

Tergovga qadar tekshiruv davomida hokim yordamchisi 1000 AQSh dollarini shahar hokimligining yetakchi mutaxassisiga berishi kerakligi maʼlum boʻlib, tezkor tadbir davom ettirildi va u ham ushbu pul mablagʻini olgan vaqtida ashyoviy dalillar bilan ushlandi.

Hozirda qonunbuzarlarga nisbatan jinoyat ishi qoʻzgʻatilib, tergov harakatlari olib borilmoqda.