Ehson bahonasida terrorizm: IIV ogohlantirish bilan chiqdi
Internetdagi "Sahovatli qoʻllar" va "Murgʻak qalblar" kabi jamgʻarmalar Suriyadagi "Tavhid va jihod" katibasi tashkiloti aʼzosi, qirgʻizistonlik Abdulmuhsin Usmonovga tegishli ekani aniqlandi.
Ehson bahonasida terroristik tashkilotlarga pul oʻtkazayotganlar ogohlantirildi. Bu haqda IIV maʼlumot berdi.
Jumladan, internetdagi "Sahovatli qoʻllar" va "Murgʻak qalblar" kabi jamgʻarmalar Suriyadagi "Tavhid va jihod" katibasi tashkiloti aʼzosi, Qirgʻiziston fuqarosi Abdulmuhsin Usmonovga tegishli ekani aniqlandi.
2016 yildan buyon Suriyada boʻlib turgan ushbu shaxsga Qirgʻiziston huquq-tartibot idoralari qidiruv eʼlon qilgan.
Bundan tashqari Janubiy Koreyada ham Oʻzbekiston fuqarosi Gʻazoga yordam bahonasida terroristik tashkilot uchun pul yigʻayotgani aniqlandi. Shunga oʻxshash oʻnga yaqin holat aniqlangan.
Mazkur holatlar yuzasidan JKning 155-moddasi boʻyicha ish ochilgan.
