33 mingga yaqin fuqaro Oʻzbekistonga qaytarildi
Fuqarolarning Vatanga qaytarilishi boʻyicha diplomatik vakolatxonalar faoliyati davom etmoqda.
13 mart kuni soat 07:00 holatiga koʻra, Yaqin Sharq mamlakatlaridan Oʻzbekistonning 32934 nafar fuqarosi Vatanga qaytarilgan. Bu haqda Tashqi ishlar vazirligi xabar berdi.
Qayd etilishicha, 12 mart kuni Qatardagi elchixona tomonidan 49 nafar fuqaro BAA va Saudiya Arabistoniga yetkazilib, soʻngra Toshkentga uchgan. Ayni paytda navbatdagi fuqarolar guruhi shakllantirilib, ularning Doha shahridan Dubay orqali Oʻzbekistonga qaytishi masalalari ishlab chiqilmoqda.
BAAdagi diplomatik vakolatxonalar koʻmagida 147 nafar fuqaro Toshkentga uchib ketgan. Erondagi elchixona tomonidan 5 nafar fuqaro qoʻshni davlatlar hududi orqali chiqib ketgan. Isroildan esa 4 nafar fuqaro Misr orqali Oʻzbekistonga qaytgan.
Oʻzbekistonning Saudiya Arabistonidagi elchixonasi, Jidda shahridagi bosh konsulxonasi va Transport vazirligi bilan hamkorlikda charter reyslari orqali 2735 nafar fuqaro Vatanga qaytgan va mazkur mamlakatda evakuatsiya tadbirlari yakunlangan.
Oʻzbekiston fuqarolarining Vatanga qaytarilishi boʻyicha diplomatik vakolatxonalar faoliyati davom etmoqda.
