Qirgʻizistonga 2,1 mlrd soʻmlik oltinni yashirincha olib chiqib ketmoqchi boʻlgan shaxs ushlandi
"Vodil-avto" chegara bojxona postiga kirib kelgan "Damas" tekshiruvdan oʻtkazilgan.
Qirgʻizistonga yashirincha olib ketilayotgan 2,1 mlrd soʻmlik oltin quymalar toʻxtatib qolindi.
Tovar-moddiy boyliklarning mamlakat hududidan noqonuniy olib chiqilishiga qarshi kurashish yoʻnalishida Davlat xavfsizlik xizmatining Fargʻona viloyati boʻyicha boshqarmasi va Bojxona idoralari xodimlari hamkorligida tezkor tadbir oʻtkazildi.
Jumladan, Fargʻona tumanida yashovchi, 1996 y.t. shaxs boshqaruvidagi “Damas” rusumli avtotransport vositasi Qirgʻiz Respublikasiga chiqish maqsadida “Vodil-avto” chegara bojxona postiga kirib kelgan vaqtida tekshiruvdan oʻtkazildi.
Natijada, avtomashina kuzov qismining ichiga yashirilgan 4 dona nostandart shakldagi oltin quymalar borligi aniqlanib, ashyoviy dalil sifatida rasmiylashtirib olindi.
Ekspertiza xulosasiga koʻra, ularning sof ogʻirligi 1 kg 232 gr boʻlib, umumiy bahosi 2 mlrd 182 mln 466 ming soʻmni tashkil etadi.
Holat yuzasidan DXX Fargʻona viloyati boʻyicha boshqarmasi Tergov boʻlimi tomonidan mazkur shaxsga nisbatan Jinoyat Kodeksining 182-moddasi (bojxona toʻgʻrisidagi qonunchilikni buzish) 2-qismi “a” bandi bilan jinoyat ishi qoʻzgʻatilib, tergov harakatlari olib borilmoqda.
