Fargʻonada suv taʼminoti xodimini kaltaklagan shaxs ushlandi
Xodim xonadonlardan birida suv taʼminoti holatini oʻrganish davomida roʻyxatdan oʻtkazilmagan hisoblagich mavjudligini aniqlagan.
Fargʻonada suv taʼminoti xodimini kaltaklagan shaxs qoʻlga olindi.
Ijtimoiy tarmoqlarda Fargʻona viloyati, Oʻzbekiston tumanida xizmat vazifasini bajarayotgan suv taʼminoti xodimi kaltaklangani haqida xabarlar tarqaldi.
Aniqlanishicha, joriy yilning 9 mart kuni “Fargʻona suv taʼminoti” MChJning Oʻzbekiston tumani filiali inspektori D.S. tumandagi Sochtepa koʻchasida joylashgan xonadonlardan biriga borgan. Ushbu xonadonda suv taʼminoti holatini oʻrganish davomida roʻyxatdan oʻtkazilmagan hisoblagich mavjudligi aniqlangan.
Mazkur holat yuzasidan tegishli hujjatlar rasmiylashtirilib, jarima qoʻllanilishi haqida maʼlum qilingan vaqtda ushbu xonadonda yashovchi fuqaro Fazliddin Pardayev xizmat vazifasini bajarayotgan inspektor D.S.ga qarshilik qilib, janjallashgan. Janjal davomida F.Pardayev oʻsha yerda boʻlgan yogʻoch boʻlagi bilan inspektor D.S.ning bosh qismiga urib, unga tan jarohati yetkazgan.
Bosh prokuratura xabariga koʻra, mazkur holat yuzasidan Jinoyat kodeksining 219-moddasi (Hokimiyat vakiliga yoki fuqaroviy burchini bajarayotgan shaxsga qarshilik koʻrsatish) 2-qismi bilan jinoyat ishi qoʻzgʻatilgan.
Gumonlanuvchi F.Pardayev protsessual tartibda ushlangan.
Hozirda prokuratura tomonidan tergov harakatlari olib borilmoqda.
