Putin Eron prezidenti bilan telefon muloqoti oʻtkazdi

Rossiya prezidenti Vladimir Putin Eron Islom Respublikasi Prezidenti Maʼsud Pezeshkiyon bilan telefon orqali suhbatlashdi. Bu haqda Kreml matbuot xizmati xabar berdi.

Rossiya Prezidenti Eron Islom Respublikasi Oliy Rahbari Oyatulloh Xomanaiy, uning oila aʼzolari va mamlakat harbiy va siyosiy rahbariyati aʼzolarining oʻldirilishi hamda Isroil-Amerika hujumi natijasida koʻplab tinch aholining qurbon boʻlishi munosabati bilan chuqur hamdardlik bildirdi.

Aytilishicha, Rossiyaning harbiy harakatlarni zudlik bilan toʻxtatish, Eron atrofidagi va butun Yaqin Sharqdagi muammolarni hal qilishning kuch ishlatish usullaridan voz kechish va siyosiy va diplomatik yechim yoʻliga tezda qaytish zarurligi haqidagi prinsipial pozitsiyasi yana bir bor tasdiqlangan.

Shu munosabat bilan Vladimir Putin Fors koʻrfazi hamkorlik kengashi mamlakatlari rahbarlari bilan doimiy aloqada ekanligini taʼkidladi.

"Maʼsud Pezeshkiyon Rossiyaning oʻz vatanining suvereniteti va mustaqilligini himoya qilayotgan Eron xalqi bilan birdamligi uchun minnatdorchilik bildirdi va mojaroning hozirgi keskin bosqichidagi voqealar haqida batafsil maʼlumot berdi.

Eron tomoni bilan turli kanallar orqali aloqalar davom etishiga kelishib olindi", deyiladi xabarda.

Eslatib oʻtamiz, 28 fevral kuni Isroil va AQSh kuchlari Eronga zarbalar berdi. Eron bunga javoban Isroil va Yaqin Sharqdagi AQSh bazalariga zarbalar yoʻlladi.