Ichki isteʼmoldagi mahalliy dorilar ulushi 70 foizga yetkaziladi
Hokimlarda hududidagi farmatsevtika korxonalari bilan gaplashib, ular koʻtargan masalalarga yechim topadigan tizim yoʻqligi koʻrsatib oʻtildi.
Prezident Shavkat Mirziyoyev raisligida farmatsevtika sohasini rivojlantirish boʻyicha ustuvor vazifalarga bagʻishlangan videoselektor yigʻilishi boʻlib oʻtmoqda. Tadbirda farmatsevtika korxonalari vakillari ham ishtirok etmoqda.
“Tibbiyotdagi keng koʻlamli islohotlarimiz, birlamchi boʻgʻinda profilaktikaning kuchaytirilishi kasalliklarni davolash bilan birga uning oldini olishga qaratilgan preparatlarni koʻpaytirishni taqozo etmoqda”, – dedi davlatimiz rahbari.
Shu bois, mutasaddilar oldida bu yil sohaga kamida 1 milliard dollar investitsiya olib kelish, sifatni oshirish va xorijiy yetuk farmatsevtika kompaniyalari bilan hamkorlikda yangi ishlab chiqarish quvvatlarini ishga tushirish orqali ichki isteʼmoldagi mahalliy dorilar ulushini 2030 yilgacha 70 foizga yetkazish, kelgusi besh yilda eksportni 1 milliard dollarga olib chiqish vazifalari turgani qayd etildi.
Bu borada 100 dan ziyod ishlab chiqaruvchilar, 50 dan ortiq importchilar, 300 ga yaqin ulgurji va chakana savdo korxonalari, investorlar bilan sohadagi masalalar muhokama qilindi, bildirilgan taklif va tashabbuslar asosida katta qaror loyihasi tayyorlandi.
Shunday boʻlsa-da, hokimlarda hududidagi farmatsevtika korxonalari bilan gaplashib, ular koʻtargan masalalarga yechim topadigan tizim yoʻqligi koʻrsatib oʻtildi.
