Shavkat Mirziyoyev Ummonga borishi kutilyapti
Telefon orqali muloqotda Yaqin Sharqdagi hozirgi murakkab vaziyat muhokama qilinib, beqarorlik jiddiy tashvish uygʻotayotgani qayd etilgan.
Prezident Shavkat Mirziyoyev Ummonga davlat tashrifi bilan borishi kutilyapti. 4 mart kuni Shavkat Mirziyoyev va Ummon sultoni Haysam bin Toriq Ol Said oʻrtasida telefon suhbati boʻlib oʻtdi.
Ummon Sultoni Oʻzbekiston yetakchisiga hamjihatlik va birdamlik tuygʻulari uchun tashakkur izhor etib, Masqatga boʻlajak oliy darajadagi tarixiy tashrif yuksak saviyada oʻtishiga ishonch bildirgan.
Muloqotda Yaqin Sharqdagi hozirgi murakkab vaziyat muhokama qilinib, yuzaga kelgan beqarorlik jiddiy tashvish uygʻotayotgani qayd etilgan.
Oʻzbekiston Prezidenti Ummon hududida sodir boʻlgan bunday harakatlardan xavotirda ekanini bildirib, Oʻzbekiston har qanday qarama-qarshilik hamda ziddiyatni siyosiy-diplomatik va tinch yoʻllar bilan, muzokaralar orqali hal qilishning qatʼiy tarafdori ekanligini taʼkidlagan.
Shuningdek, Ummonda boʻlib turgan Oʻzbekiston fuqarolarining xavfsizligini taʼminlash va ularni Vataniga qaytarish uchun yaratilayotgan shart-sharoit uchun Sulton Aʼlo hazratlariga chuqur minnatdorlik bildirgan.
