600 mingdan oshiq oilalarga yordam pullari toʻlab berildi
Birinchi bosqichda jami 422,4 mlrd soʻm mablagʻ toʻlangan. Ikkinchi bosqichda esa roʻyxati qoʻshimcha shakllantirilgan hamda hujjatlari oʻrganilayotgan oilalarga moddiy yordam yoʻnaltiriladi.
600 mingdan oshiq oilalarga yordam pullari toʻlab berildi. Bu haqda Ijtimoiy himoya milliy agentligi xabar berdi.
Prezidentning 67-son qaroriga muvofiq, ehtiyojmand aholini qoʻllab-quvvatlash maqsadida moddiy yordam toʻlovlari bosqichma-bosqich amalga oshirilmoqda.
Birinchi bosqichda 616 305 ta oilaga jami 422,4 mlrd soʻm mablagʻ toʻlab berildi.
Jumladan:
225 541 ta oilaga 1 million soʻmdan moddiy yordam ajratildi, shundan:
- 207 661 ta — davlat taʼminotidagi oilalarga;
- 3 848 ta — yetim va ota-ona qaramogʻidan mahrum boʻlgan bolalar yashayotgan oilalarga;
- 17 032 ta — yolgʻiz yashovchi, parvarishga muhtoj keksalar va nogironligi boʻlgan shaxslarga.
387 764 ta kam taʼminlangan oilaga esa 500 ming soʻmdan mablagʻ toʻlab berildi.
Ikkinchi bosqichda esa roʻyxati qoʻshimcha shakllantirilgan hamda hujjatlari oʻrganilayotgan oilalarga moddiy yordam yoʻnaltiriladi.
Moddiy yordam koʻrsatish jarayoni shaffoflik va manzillilik tamoyillari asosida davom ettirilmoqda.
Avvalroq Ramazonga vaʼda qilingan ijtimoiy toʻlovlar miqdori belgilangandi.
Mazkur yordamlar "Vaqf" fondi, Ijtimoiy himoya milliy agentligi va Xalq banki tomonidan 2026 yil 1 martgacha ijtimoiy yoki plastik kartalarga tushirib berilishi koʻzda tutilgan.
