Yoshlar tadbirkorligi uchun qoʻshimcha 200 million dollar ajratiladi
Oʻzini oʻzi band qilgan yoshlar uchun kredit miqdori 100 milliondan 300 million soʻmgacha oshiriladi. Yosh tadbirkorlar loyihalari uchun 10 milliard soʻmgacha kredit ajratish mumkin boʻladi.
Har yili 600 ming yoshlar mehnat bozoriga kirib kelmoqda, 2030 yilga borib, ular 1 millionga yetadi. Yoshlarga oʻziga mos ish topishi uchun sharoit yaratish – eng muhim masala ekani qayd etildi.
Yoshlar oʻrtasida soʻrovnoma oʻtkazilib, ularning uchdan biri tadbirkor boʻlish istagini bildirgan. Oʻtgan yili yoshlar bandligini taʼminlash uchun banklar va Yoshlar ishlari agentligiga 400 million dollar berilgan edi.
Xususan, “Yoshlar biznesi”, “Kelajakka qadam” dasturlari hisobidan 15 ming nafar yoshlar oʻz tadbirkorligini yoʻlga qoʻydi, 50 ming odamni ish bilan taʼminladi.
Prezidentimiz yoshlar tadbirkorligi uchun qoʻshimcha 200 million dollar ajratilishini eʼlon qildi.
Oʻzini oʻzi band qilgan yoshlar uchun kredit miqdori 100 milliondan 300 million soʻmgacha oshiriladi. Yosh tadbirkorlar loyihalari uchun 10 milliard soʻmgacha kredit ajratish (hozir 5 milliard soʻmgacha) mumkin boʻladi. Innovatsion startap loyihalariga 100 ming dollargacha investitsiya kiritishga ruxsat beriladi.
Servis va umumiy ovqatlanish sohasida 1 mingdan ziyod ish oʻrni yaratgan mahalliy brendlardan franshiza olib, filial ochishga qiziqayotgan yoshlar uchun qulay moliyalashtirish paketlari joriy qilinadi.
Avvalroq haftaning payshanba kuni vazirlik, idora va hokimliklarda "Yoshlar kuni" boʻlishi belgilangandi.
Shu kuni sohaga masʼul rahbarlar mahalla, maktab va texnikumlarga borib, yoshlarni eshitadi va muammosini hal qiladi.
