Hokim yordamchisi 50 ming dollarga yer sotmoqchi boʻlganda ushlandi
Toshkent viloyati Qibray tumanida tezkor tadbir oʻtkazildi. Hokim yordamchisi soʻralgan pul mablagʻidan 10 ming AQSh dollarini olgan vaqtida ashyoviy dalillar bilan qoʻlga tushgan.
Qibray tumani hokimining MFYdagi yordamchisi 10 ming dollar bilan qoʻlga tushdi.
Toshkent viloyati Qibray tumani hokimining tadbirkorlikni rivojlantirish, aholi bandligini taʼminlash va qambagʻallikni qisqartirish masalalari boʻyicha mahalla fuqarolar yigʻinlaridan biridagi yordamchisi MFY binosi yonida joylashgan va davlat zaxirasida boʻlgan 4 sotix yer maydonini hokimlikda ishlovchi tanishlari yordamida arxiv hujjatlariga soxta maʼlumotlar kiritish orqali xaridor nomiga rasmiylashtirib berish evaziga 50 ming AQSh dollari talab qiladi.
Davlat xavfsizlik xizmatining Toshkent viloyati boʻyicha boshqarmasi va Iqtisodiy jinoyatlarga qarshi kurashish departamenti xodimlari tomonidan oʻtkazilgan tezkor tadbirda, u soʻralgan pul mablagʻidan 10 ming AQSh dollarini olgan vaqtida ashyoviy dalillar bilan ushlandi.
Holat yuzasidan hokim yordamchisiga nisbatan Jinoyat Kodeksining 168-moddasi 4-qismi “a” bandi va 28,211-moddasi 3-qismi “a” bandi bilan jinoyat ishi qoʻzgʻatilib, tergov harakatlari olib borilmoqda.
Avvalroq Jizzaxda hokimlik bosh mutaxassisi pora bilan ushlangandi.
U oʻzining oʻgʻliga tegishli boʻlgan fermer xoʻjaligining 11 gektar yer maydonini sotmoqchi boʻlgan.
