Pokiston Afgʻoniston hududiga zarbalar yoʻlladi: oʻnlab qurbonlar bor
"Tolibon" hujumlar Nangarhor va Paktiya viloyatlaridagi tinch aholi punktlariga qaratilgani aytdi. Pokiston esa chegara yaqinidagi yettita jangarilar lageriga zarba berganini daʼvo qildi.
Pokiston Afgʻoniston hududiga zarbalar berdi, "Tolibon" oʻnlab odamlarning oʻldirilganini daʼvo qilmoqda.
Afgʻoniston rasmiylarining taʼkidlashicha, Pokiston armiyasi tomonidan Afgʻonistonda 22 fevral kuni kechasi amalga oshirilgan havo hujumlarida oʻnlab odamlar, jumladan, ayollar va bolalar halok boʻldi va yaralandi.
Afgʻoniston Mudofaa vazirligi maʼlumotlariga koʻra, hujumlar Nangarhor va Paktiya viloyatlaridagi tinch aholi punktlariga qaratilgan. Ular hujumlarni "Afgʻonistonning hududiy yaxlitligi va xalqaro huquqning qoʻpol buzilishi" deb atashdi.
Nangarhor viloyati rasmiylari BBCʼga bergan intervyusida, hujumlardan biri Shahabuddin ismli erkakning uyiga urilganini va uning oilasining taxminan 20 aʼzosi, jumladan, ayollar va bolalar halok boʻlganini aytishdi.
Rasmiy Islomobodning aytishicha, hujumlar Pokiston-Afgʻoniston chegarasi yaqinidagi yettita jangarilar lageri va boshpanalariga qaratilgan.
Pokiston Axborot va radioeshittirish vazirligi ijtimoiy tarmoqlardagi bayonotida hujumlar taqiqlangan "Tehrik-e-Tolibon Pokiston" va "Islomiy Davlat-Xorason viloyati" tashkilotlari aʼzolariga, shuningdek, ularning filiallariga qaratilganini maʼlum qildi.
Vazirlik hujumlarni Pokistonda yaqinda Kobulda yashiringan deb hisoblagan guruhlar tomonidan amalga oshirilgan xudkushlik hujumlariga "jazolovchi javob" deb atadi.
Bir necha kun avval Pokiston shimoli-gʻarbidagi portlashlarda kamida 17 kishi halok boʻlgandi.
Hodisalar Pokiston xavfsizlik kuchlari Afgʻoniston bilan chegaradosh hududlardagi qoʻzgʻolonlarga qarshi kurash olib borayotgan paytda sodir boʻldi. Javobgarlik Hindiston tomonidan qoʻllab-quvvatlanadigan guruhga yuklandi.
