AQSh Oʻzbekistondagi ikki kompaniya vakillariga qarshi viza cheklovlari kiritdi
Ular fuqarolarning AQShga noqonuniy yoʻllar bilan kirib borishiga sharoit yaratib berishda ayblangan.
AQSh Davlat departamenti Oʻzbekistondagi ikkita vizaga koʻmaklashish kompaniyasining rahbarlari va mulozimlariga nisbatan viza cheklovlarini joriy qilganini eʼlon qildi.
Ushbu shaxslar Oʻzbekiston fuqarolarining AQShga noqonuniy yoʻllar bilan kirib borishiga ataylab sharoit yaratib berishda ayblanmoqda.
Cheklovlar Oʻzbekistonda joylashgan, aslida noqonuniy migratsiyani maqsad qilgan shaxslarga sayohat xizmatlarini koʻrsatgan ikkita xususiy kompaniya vakillariga qaratilgan.Davlat departamentining maʼlum qilishicha, ushbu shaxslar migrantlarni, jumladan voyaga yetmaganlarni ham Markaziy Amerikadagi tranzit nuqtalari orqali AQSh chegarasiga yetib olishlari uchun transport va logistika ishlarini muvofiqlashtirgan.
"Biz noqonuniy immigratsiyadan foyda koʻrayotganlarni javobgarlikka tortishda davom etamiz va chegaralarimizni himoya qilish uchun odam kontrandasi bilan shugʻullanuvchi tarmoqlarga qarshi keskin choralar koʻramiz," — deyiladi bayonotda.
Rasmiy Vashington noqonuniy migratsiya bilan shugʻullanuvchi jinoiy tarmoqlarga chek qoʻyishda Oʻzbekiston hukumati koʻrsatayotgan yaqin hamkorlikni yuqori baholashini alohida taʼkidlab oʻtdi.
Ushbu cheklovlar faqat noqonuniy faoliyatga aloqador shaxslarga tegishli boʻlib, qonuniy yoʻl bilan AQShga sayohat qiluvchi Oʻzbekiston fuqarolariga nisbatan qoʻllanilmaydi.
