Prezident: Oʻzbekiston Gʻazoda bogʻcha, maktab va shifoxonalar qurishga hissa qoʻshadi
Gʻazoning har qanday tashqi boshqaruv mexanizmi sektor aholisining soʻzsiz ichki qoʻllab-quvvatlashiga tayanishi lozim.
Oʻzbekiston Prezidenti Shavkat Mirziyoyev Tinchlik kengashining birinchi sammitida nutq soʻzladi.
Prezidentga koʻra, Oʻzbekiston Tinchlik kengashini tuzish boʻyicha tinchliksevar tashabbusni qoʻllab-quvvatladi va uning muvaffaqiyatli amalga oshirilishi borasida oʻzining amaliy ishtirokini qatʼiy bayon etdi.
Kengash ishi Gʻazo mintaqasini iqtisodiy va ijtimoiy qayta tiklash uchun qulay sharoit yaratishga imkon beradi.
"Shu bilan birga, Gʻazoning har qanday tashqi boshqaruv mexanizmi sektor aholisining soʻzsiz ichki qoʻllab-quvvatlashiga tayanishi lozim.
Barcha tomonlarning muvofiqlashtirilgan saʼy-harakatlari Gʻazoni tez fursatda qayta tiklash uchun zarur shart-sharoitlarni yaratishga, mojarodan keyingi jarayonlarni barqarorlashtirishga xizmat qiladi.
Taʼkidlab aytamanki, Oʻzbekiston ushbu hududda turar joylar, bolalar bogʻchalari, maktab va kasalxonalar barpo etishga imkon qadar hissa qoʻshishga tayyor", deya taʼkidladi prezident.
" Biz Yangi Gʻazoni – iqtisodiyoti farovon, aholi uchun munosib turmush sharoitlariga ega boʻlgan mintaqani barpo etish uchun ushbu tarixiy imkoniyatdan foydalanishimiz zarur", deya fikrini xulosaladi Oʻzbekiston rahbari.
