Xorazmda Muhammad al-Xorazmiy haykali uchun 25 mlrd soʻm ajratiladi
Viloyat hokimi Joʻrabek Rahimov tegishli farmoyishni imzoladi. Mablagʻ viloyat byudjetidan taqdim etiladi.
Xorazmda al-Xorazmiy haykali uchun 25 mlrd soʻm ajratiladi. Bu haqda viloyat hokimining 2026 yil 18 fevraldagi farmoyishida aytiladi.
Unga koʻra, al-Xorazmiy haykalini yasash, oʻrnatish hamda uning atrofidagi xiyobonni obodonlashtirish ishlarini moliyalashtirishga 25 mlrd soʻm beriladi. Mazkur ishlar uchun viloyat mahalliy byudjetining 2026 yil 1 yanvar holatiga koʻra shakllangan erkin qoldiq mablagʻlari hisobidan 25 milliard soʻm. Oʻzbekiston Badiiy akademiyasiga oʻtkazib beriladi.
Ushbu hujjat Prezidentning 2025 yil may oyida Xorazm viloyatiga tashrifi davomida berilgan topshiriqlar hamda xalq deputatlari viloyat Kengashining tegishli qaroriga muvofiq qabul qilingan.
Loyiha ijrosini nazorat qilish viloyat hokimining birinchi oʻrinbosari Anvar Davletov zimmasiga yuklatildi.
