Pokiston shimoli-gʻarbidagi portlashlarda kamida 17 kishi halok boʻldi

Pokiston shimoli-gʻarbida ikki portlash va otishmada kamida 17 kishi halok boʻldi.

Pokiston shimoli-gʻarbida sodir boʻlgan ikki portlash hamda politsiya va jangarilar oʻrtasidagi otishma oqibatida kamida 14 nafar xavfsizlik xodimi va uch nafar tinch aholi vakili, jumladan bir bola halok boʻldi.

Dushanba kuni Xaybar Paxtunxva viloyatida yuz bergan alohida hodisalar oqibatida oʻnlab odamlar yaralandi. Bu voqealar Pokiston xavfsizlik kuchlari Afgʻoniston bilan chegaradosh janubiy va shimoliy hududlarda kuchayib borayotgan qoʻzgʻolonlarga qarshi kurash olib borayotgan bir paytda sodir boʻldi.

Shu oy boshida IShID guruhi poytaxt Islomoboddagi shia masjidida sodir etilgan yirik xudkushlik portlashi uchun javobgarlikni oʻz zimmasiga olgan edi. Ushbu hujum oqibatida 31 kishi halok boʻlgan, 169 kishi yaralangan.

Soʻnggi hujumlar Xaybar Paxtunxva nazorat-oʻtkazish punkti va politsiya boʻlimini nishonga olgan, deyiladi harbiy bayonot va xavfsizlik rasmiysi maʼlumotida.

Jangarilar portlovchi moddalar ortilgan avtomobilni Bajaur tumanidagi nazorat punkti yaqinidagi devorga urib yuborgan. Harbiylar maʼlumotiga koʻra, natijada 11 nafar xavfsizlik xodimi va bir qiz bola halok boʻlgan.

Portlash yaqin atrofdagi turar joy binolariga jiddiy zarar yetkazgan va yosh qizning halok boʻlishiga sabab boʻlgan, yana yetti kishi jarohat olgan.

Harbiylar bu hujumni terrorchilik terakti deb atab, uni Hindiston tomonidan qoʻllab-quvvatlanadigan guruhga yukladi.

Bayonotda aytilishicha, voqea joyidan qochishga uringan oʻnlab jangarilar xavfsizlik kuchlari tomonidan yoʻq qilingan.

Yana bir hujum Bannu shahrida sodir boʻlgan. Rikshaga oʻrnatilgan bomba Miryan politsiya mahkamasi binosida portlab, ikki nafar fuqaro halok boʻlgan va 17 kishi yaralangan.

Xitoy fuqarolari nishonga olingan

Viloyatning boshqa hududida — Shangla tumanida oʻtkazilgan qidiruv amaliyoti chogʻida uch nafar politsiyachi va uch nafar jangari halok boʻlgan.

Xaybar Paxtunxva politsiyasi bayonotiga koʻra, oʻldirilgan uch jangari xitoylik fuqarolarni nishonga olgan hujumlarga aloqador boʻlgan.

Xitoy soʻnggi yillarda Pokistonga milliardlab dollar sarmoya kiritgan. Biroq Xitoy moliyalashtirgan loyihalar ayrim hududlarda norozilikka sabab boʻlgan va xitoylik fuqarolar tez-tez hujumlarga uchramoqda.

Oʻtgan yil mart oyida yirik GES qurilishida ishlayotgan besh nafar xitoylik va ularning haydovchisi terrorchi tomonidan uyushtirilgan hujum oqibatida halok boʻlgan.

Xitoy Islomobodning eng yaqin mintaqaviy ittifoqchisi hisoblanadi va koʻpincha moliyaviy qiyinchiliklarga duch keladigan qoʻshnisiga yordam koʻrsatib keladi.