Iordaniya Oʻzbekiston bilan hibsga olinganlarni topshirish toʻgʻrisidagi bitimni ratifikatsiya qildi
Hujjat qirol Abdulloh II ibn al-Husaynning Oʻzbekistonga davlat tashrifi doirasida imzolangan.
Iordaniya Senati Oʻzbekiston hukumati va Iordaniya hukumati oʻrtasida hibsga olinganlarni topshirish toʻgʻrisidagi bitimni ratifikatsiya qilish toʻgʻrisidagi qonun loyihasini maʼqulladi.
Hujjat 2025 yil 26 avgustda Samarqandda Iordaniya Hoshimiylar Qirolligi qiroli Abdulloh II ibn al-Husaynning Oʻzbekistonga davlat tashrifi doirasida imzolangan.
Muqaddima va 23 ta moddadan iborat ushbu bitim shaxslarni jinoiy javobgarlikka tortish yoki hukmni ijro etish maqsadida topshirish tartibi, asoslari va shartlarini belgilaydi.
Hujjatning kuchga kirishi ikki mamlakat huquqni muhofaza qilish organlarining jinoiy ishlarni tergov qilish va sudga berishdagi samaradorligini oshiradi, shuningdek, javobgarlikning muqarrarligi tamoyilini mustahkamlash orqali jazodan qochishning oldini oladi.
