Pavel Durov Rossiya hukumatiga ayblov bilan chiqdi
Roskomnadzor mamlakatda Telegramni rasman cheklashni boshladi. Durov esa rasmiylarni "davlat tomonidan nazorat qilinadigan ilovaga oʻtishga majburlash"da aybladi.
Rossiyada Telegram faoliyatida muammolar boshlandi.
Messenjer asoschisi Pavel Durov Rossiya hukumatiga ayblov bilan chiqdi.
Durov "fuqarolarini kuzatuv va siyosiy senzura uchun moʻljallangan davlat tomonidan nazorat qilinadigan ilovaga oʻtishga majburlashga" urinishda aybladi.
Tadbirkor oʻz platformasi bosimdan qatʼi nazar, soʻz erkinligi va shaxsiy hayotga daxldorlikni himoya qilishini taʼkidladi.
"Sakkiz yil oldin Eron ham xuddi shunday strategiyani sinab koʻrdi va muvaffaqiyatsizlikka uchradi. Ular Telegramni uydirma bahonalar bilan taqiqlab, odamlarni davlat tomonidan boshqariladigan alternativaga oʻtishga majburlashga harakat qilishdi.
Taqiqqa qaramay, aksariyat eronliklar hali ham Telegramdan foydalanadilar (senzurani chetlab oʻtib) va uni kuzatuv ostidagi ilovalardan afzal koʻrishadi", deya yozdi Durov oʻz kanalida.
Roskomnadzor Rossiyada Telegram messenjerini rasman cheklashni boshladi. IT sohasidagi va davlat idoralaridagi RBK manbalariga koʻra, regulyator xizmatni sekinlashtira boshladi.
Telegramni qisman cheklash boʻyicha birinchi choralar seshanba, 10 fevral kuni joriy etildi.
Bir manbaga koʻra, messenjerga kirish tezligini maxsus ravishda kamaytirish boʻyicha texnik ishlar allaqachon boshlangan.
Rossiya vakillari Telegramni davlat xavfsizlik idoralari bilan hamkorlik qilmaslik va boshqalarda ayblaydi.