Giyohvandlik yoki psixotrop moddalarni jamoat joyida isteʼmol qilganlik uchun javobgarlik belgilanadi
Bu turdagi jinoyatlarni qayta sodir etilishining oldini olish maqsadida jinoiy javobgarlik choralari kuchaytiriladi.
Giyohvandlik vositalari, psixotrop yoki kuchli taʼsir qiluvchi moddalarni jamoat joylarida isteʼmol qilganlik uchun javobgarlik belgilanadi.
Qonunchilik palatasi majlisida giyohvandlik vositalari, psixotrop va kuchli taʼsir qiluvchi moddalarning noqonuniy muomalasi uchun javobgarlikni kuchaytirishga qaratilgan qonun loyihasi ikkinchi oʻqishda moddama-modda koʻrib chiqildi.
Ushbu qonun loyihasi bilan Oʻzbekiston Respublikasining Jinoyat, Jinoyat-protsessual hamda Maʼmuriy javobgarlik toʻgʻrisidagi kodekslariga bir qator oʻzgartirish va qoʻshimchalar kiritish taklif etilmoqda.
Xususan, Jinoyat kodeksidagi giyohvandlik vositalari yoki psixotrop moddalar, shuningdek kuchli taʼsir qiluvchi yoki zaharli moddalar bilan qonunga xilof ravishda muomala qilishdan iborat jinoyatlar aholi salomatligi va genofondiga qarshi jinoyatlar sifatida alohida bobga birlashtirilmoqda.
Shuningdek, Jinoyat kodeksidagi mazkur bobda narkotiklarning noqonuniy muomalasiga hokimiyat (mansab) vakolatlarini suiisteʼmol qilish yoʻli bilan homiylik (rahnamolik) qilish hamda gʻayriqonuniy narkolaboratoriya tashkil etish va uning faoliyat yuritishini taʼminlash kabi qilmishlar uchun jinoiy javobgarlikni nazarda tutuvchi yangi normalar belgilanmoqda.
Maʼmuriy javobgarlik toʻgʻrisidagi kodeksga esa giyohvandlik vositalari, psixotrop yoki kuchli taʼsir qiluvchi moddalarni jamoat joylarida isteʼmol qilganlik uchun javobgarlik belgilash nazarda tutilyapti.
Bundan tashqari, bu turdagi jinoyatlarni qayta sodir etilishining oldini olish maqsadida jinoiy javobgarlik choralari kuchaytirilmoqda.
Avvalroq oʻz huquqbuzarligini internetda tarqatganlar javobgarlikka tortilishi maʼlum boʻlgandi.