Jamshid Xoʻjayev metan zapravka qurishga ruxsat yoʻqligini aytdi
Bosh vazir oʻrinbosari bu haqda Qoraqalpogʻistonda tadbirkorlar bilan oʻtkazgan uchrashuvida gapirgan.
Bosh vazir oʻrinbosari Jamshid Xoʻjayev hukumat vakillarining Qoraqalpogʻiston Respublikasida tadbirkorlar bilan oʻtkazgan uchrashuvida metan zapravka qurishga ruxsat yoʻqligini eslatdi.
Uchrashuv davomida Amudaryo tumanilik tadbirkor avtomobillar uchun elektr, gaz va benzin quyish shoxobchasini qurishni rejalashtirgani, buning uchun 2024 yilda yer olgani hamda qurilishga doir barcha hujjatlar ekspertizadan oʻtkazilganini bildirdi.
Xoʻjayevning aytishicha, hozirda ishlab turgan metan zapravkalarga ham gaz yetishmayapti.
Shu bois yangi zapravkalar qurish iqtisodiy jihatdan maqsadga muvofiq emasligi taʼkidlandi.
“Qurganingiz bilan pulingiz shunday yotadi. Sizga metan bermaydi. Qurilishni boshlamaslik kerak. Nega buni hokimiyat aytmaydi?” dedi bosh vazir oʻrinbosari.