Angrenda koʻp qavatli uy yondi: bir kishi halok boʻldi
Binodan fuqarolar toʻliq evakuatsiya qilingan.
7 fevral kuni soat 23:19 da Toshkent viloyati Angren shahridagi koʻp qavatli uylarning birida yongʻin kelib chiqdi. Bu haqda Favqulodda vaziyatlar vazirligi xabar berdi.
Yongʻin oqibatida bir kishi halok boʻldi.
Qayd etilishicha, Dukent qoʻrgʻoni "Ulugʻbek" MFYda joylashgan 4 qavatli binolar birining tom qismi yonayotgani toʻgʻrisida Toshkent viloyati FVBBga xabar qilingan. Shunga koʻra, qutqaruv ekipajlari soat 23:30 da voqea joyiga yetib borib, binodan fuqarolarni evakuatsiya qilgan.
Yongʻin soat 23:57 da qurshab olinib, soat 00:50 da toʻliq bartaraf etilgan. Hodisa sodir boʻlgan joyga favqulodda vaziyatlar vaziri Azizbek Ikromov ham yetib borgan.