Sanoat kooperatsiyasi va davlat xaridlari agentligiga direktor tayinlandi

Baxtiyor Haydarov Sanoat kooperatsiyasi va davlat xaridlari agentligi direktori lavozimiga tayinlandi.

Bu haqda Prezident farmoni qabul qilindi.

U 1989 yilda Buxoro shahrida tugʻilgan. 2010 yilda Toshkent moliya institutining bakalavriat, 2012 yilda magistratura bosqichlarini tamomlagan.

Avval Prezident administratsiyasi Ijtimoiy sohada muhim tashabbuslarni ishlab chiqish boshqarmasi boshligʻi, Toshkent shahar hokimi oʻrinbosari kabi lavozimlarda ishlagan.

Prezident farmoni bilan Sanoat kooperatsiyasi va davlat xaridlari agentligi va uning boshqaruv kengashi tashkil etildi. Unga Iqtisodiyot va moliya vazirligining davlat xaridlari sohasidagi vazifalari, funksiyalari va vakolatlari oʻtkaziladi.