Senat PayPal, Apple Pay va Google Pay yoʻlini ochadigan qonun oʻzgartirishlarini maʼqulladi
Yangi qoidalar xalqaro toʻlov tizimlarining mamlakat bozoriga kirishini osonlashtirib, maʼlumotlarni chet elda saqlashga qoʻyilgan cheklovlarni qisman yumshatadi.
Senat PayPal, Apple Pay va Google Pay yoʻlini ochadigan qonun oʻzgartirishlarini maʼqulladi.
Yangi qoidalar xalqaro toʻlov tizimlarining mamlakat bozoriga kirishini osonlashtirib, maʼlumotlarni chet elda saqlashga qoʻyilgan cheklovlarni qisman yumshatadi va fintech hamda elektron tijorat rivojiga turtki berishi kutilmoqda.
5 fevral kuni Senat "Shaxsiy maʼlumotlar toʻgʻrisida"gi qonunga oʻzgartirishlar kiritishni maʼqulladi. Bu haqda Oliy Majlisning yuqori palatasi matbuot xizmati xabar berdi.
Senatorlarning soʻzlariga koʻra, qonun loyihasining maqsadi xalqaro toʻlov tizimlarining Oʻzbekiston bozoriga kirishini kengaytirishdan iborat. Hozirgi vaqtda maʼlumotlarni mamlakat hududida saqlash talabi tufayli xalqaro tizimlarning Oʻzbekistonda faoliyat yuritishi amalda cheklangan.
Yangi qoidalar boʻyicha faqat ayrim toifadagi maʼlumotlar — biometrik va genetik maʼlumotlar hamda telekommunikatsiya xizmatlari haqidagi maʼlumotlar mahalliy serverlarda saqlanishi shart qilib belgilandi.
Boshqa maʼlumotlarni chet elda uzatish va saqlash uchun aniq xavfsizlik talablari belgilandi. Vazirlar Mahkamasi shaxsiy maʼlumotlarning himoyasi taʼminlanadigan davlatlar roʻyxatini belgilash huquqiga ega boʻladi.
Senatorlar taʼkidlaganidek, ushbu oʻzgartirishlar xalqaro toʻlov tizimlarining Oʻzbekistonda ishlashini qoʻllab-quvvatlashga qaratilgan. Ular fintech, elektron tijorat va raqamli iqtisodiyotni rivojlantirishga, sayyohlar uchun kontaktsiz toʻlov imkoniyatlarini kengaytirishga yordam berishi kutilmoqda.
Alohida taʼkidlanganidek, oʻzgartirishlar Oʻzbekiston frilanserlariga qonuniy va shaffof hisob-kitob mexanizmlarini taʼminlashda muhim ahamiyatga ega. Koʻplab mashhur xalqaro platformalar, jumladan Upwork, Fiverr, Envato va Storblocks toʻlovlarni faqat PayPal orqali amalga oshiradi.
Hozirda Oʻzbekistonda chiqarilgan bank kartalari amaldagi cheklovlar tufayli PayPal tizimida toʻliq ishlamaydi. Yangi qonun aynan shu toʻsiqlarni bartaraf etishga qaratilgan.
Oliy Majlis Qonunchilik palatasi ushbu oʻzgartirishlarni 20 yanvar kuni birdaniga uchta oʻqishda qabul qilgan edi. Oʻshanda xabar qilinganidek, oʻzgartirishlar xalqaro toʻlov tizimlarini Oʻzbekistonga jalb qilish, investitsiya muhitini yaxshilash va fuqarolar hamda sayyohlar uchun qulayliklar yaratishga qaratilgan.
Avvalroq Senat islomiy banklarga oid qonunni maʼqullagandi.