Aholi maʼlumotlari alohida serverda xavfsiz saqlanmoqda —Statistika qoʻmitasi
Roʻyxatga olish bilan bogʻliq maʼlumotlarining xavfsizligi boʻyicha xavotirga oʻrin yoʻqligi aytilgan.
Oʻzbekistonda millionlab fuqarolarning maʼlumotlari tarqalgani asosga ega emas.
Milliy statistika qoʻmitasida maʼlumotlar ehtimoliy sizib chiqishi haqidagi xabarlarga izoh berib, oʻz tomonlaridan bunday holat toʻliq istisno etilishini maʼlum qildi.
census.stat.uz da axborot xavfsizligini taʼminlash maqsadida, onlayn roʻyxatga olish yakunlanganidan soʻng Oʻzbekiston hududidan tashqarida foydalanish uchun cheklovlar oʻrnatilgan.
Shu bilan birga, respublika ichidagi baʼzi foydalanuvchilarda ham mazkur saytga kirishda cheklovlar (418 xatolik) kuzatilishi mumkin. Onlayn roʻyxatga olish veb sayti census.stat.uz 2026 yilning 15-31 yanvar kunlari faoliyat yuritdi.
Ushbu kunlari onlayn shaklda oʻtkazilgan Aholi va qishloq xoʻjaligini roʻyxatga olishda toʻplangan barcha maʼlumotlar, alohida serverda shifrlangan holda xavfsiz saqlanmoqda.
"Yurtdoshlarimizning roʻyxatga olish bilan bogʻliq maʼlumotlarining xavfsizligi boʻyicha xavotirga oʻrin yoʻqligini maʼlum qilamiz", deyiladi Oʻzstat xabarida.