Ukrainada salkam 170 ming rossiyalik harbiy halok boʻlgani aniqlandi
Bu Mediazona nashri BBCʼning rus xizmati bilan hamkorlikda eʼlon qilgan raqamlardir. Aslida yoʻqotishlar bundan koʻproq boʻlishi mumkin.
Ukrainada 168 000 dan ortiq rossiyalik harbiy halok boʻlgani aniqlandi.
Soʻnggi maʼlumotlarga koʻra, haqiqiy raqam bundan ancha yuqori boʻlishi mumkin, chunki koʻplab yoʻqotishlar rasmiy manbalarda eʼlon qilinmaydi.
Rossiyaning mustaqil Mediazona nashri BBCʼning rus xizmati bilan hamkorlikda Ukrainada halok boʻlgan 168 142 nafar rossiyalik harbiy xizmatchining shaxsini tasdiqladi.
OAVning yanvar oʻrtalaridagi soʻnggi yangilanishidan beri 4 536 nafar rossiyalik askarning ismi qurbonlar roʻyxatiga qoʻshilgan.
Jurnalistlarning taʼkidlashicha, haqiqiy raqamlar bundan ancha yuqori boʻlishi mumkin, chunki tasdiqlangan maʼlumotlar ochiq manbalardan — nekrologlar, qarindoshlarning ijtimoiy tarmoqlardagi postlari, mintaqaviy OAV xabarlari va mahalliy hokimiyat bayonotlaridan yigʻilgan.
Tasdiqlangan oʻlimlar orasida 54 600 dan ortiq koʻngillilar, 20 200 nafar qamoqxonalardan yollanganlar va 17 400 nafar safarbar etilgan askarlar borligi qayd etilgan. Shuningdek, 6 353 nafar ofitser halok boʻlgani ham tasdiqlangan.
Moskva va Kiyev kamdan-kam hollarda rasmiy ravishda yoʻqotishlar haqida maʼlumot beradi.
Jurnalistlarning yozishicha, Kreml soʻnggi oylarda jang maydonida rossiyalik askarlarning taqdiri — yoʻqolganmi yoki halok boʻlganmi — aniqlash uchun davlatga qarshi sudga murojaat qilayotgan oilalar boʻyicha sud hujjatlarini olib tashlash harakatlarini kuchaytirgan.
Soʻnggi raqamlar Strategik va xalqaro tadqiqotlar markazi tomonidan eʼlon qilingan yangi hisobot fonida taqdim etildi.
Hisobotda Rossiya Ikkinchi jahon urushidan beri har qanday yirik davlat ishtirok etgan urushlardan koʻra koʻproq yoʻqotishlarga uchragani aytiladi.
27 yanvar kuni eʼlon qilingan hisobotga koʻra, 2022 yil fevralida toʻliq miqyosdagi bosqin boshlanganidan beri Rossiya kuchlari qariyb 1,2 million nafar (halok boʻlganlar, yaradorlar va bedarak yoʻqolganlar) yoʻqotishga uchragan. Hisobotda 325 ming nafargacha rossiyalik askar halok boʻlgani qayd etiladi.
Bu koʻrsatkichlar Ukraina Bosh shtabi keltirayotgan maʼlumotlarga ham mos keladi. Bosh shtab maʼlumotiga koʻra, 31 yanvar holatiga Rossiya 2022 yil 24 fevraldan beri Ukrainada 1 239 590 nafar askarini yoʻqotgan. Bu raqamlar Gʻarb razvedka xizmatlari baholariga ham asosan mos keladi.
Ogʻir yoʻqotishlarga qaramay, Rossiya Ukrainadagi front chizigʻida kichik hududiy yutuqlarga erishishga muvaffaq boʻlmoqda, chunki u yoʻqotishlarni yangi shartnoma asosidagi askarlar bilan toʻldirib olmoqda.
Ukrainaning Deep State ochiq manbali xaritalash loyihasi maʼlumotiga koʻra, 2025 yilda Rossiya kuchlari 4 336 kvadrat kilometr (1 674 kvadrat mil) hududni egallagan boʻlib, bu mamlakat hududining 1 foizidan kamini tashkil etadi.
