Toshkentda bankir va uning sheriklari 120 ming dollar kreditni qimorga tikib yubordi
Holat yuzasidan oʻzlashtirish yoki rastrata yoʻli bilan talon-toroj qilish boʻyicha jinoyat ishi ochilgan.
Toshkent shahrida 120 000 AQSh dollarini internet tarmoqlaridagi qimor va tavakkalchilikka asoslangan oʻyinga tikib talon-toroj qilgan shaxslar fosh etildi.
Bosh prokuratura huzuridagi Departamentning Yashnobod tumani boʻlimi tomonidan tijorat bankining murojaatiga asosan tergovga qadar tekshiruv oʻtkazilgan.
Unda Yashnobod bank filialida boʻlim boshligʻi vazifasida ishlovchi E.N. “A.” MChJ masʼul shaxslari va boshqalar bilan oʻzaro til biriktirib, “B.B.” MChJga 120 000 AQSh dollari kredit ajratilishiga erishib, keyinchalik soxta hujjatlarni rasmiylashtirish orqali kredit mablagʻini naqdlashtirib olgan. Soʻngra 120 000 AQSh dollarini internet tarmoqlaridagi qimor va tavakkalchilikka asoslangan oʻyinlarga ishlatib, talon-toroj qilganliklari aniqlangan.
Mazkur holat yuzasidan Jinoyat kodeksining 167-moddasi (oʻzlashtirish yoki rastrata yoʻli bilan talon-toroj qilish) va 228-moddasi (hujjatlar, shtamplar, muhrlar, blankalar tayyorlash, ularni qalbakilashtirish, sotish yoki ulardan foydalanish) bilan jinoyat ishi qoʻzgʻatilib, tergov harakatlari oʻtkazilmoqda.
