Toshkent-Chorbogʻ yoʻlining ayrim qismlarida harakat 80 km/soatgacha cheklanadi
Ushbu yoʻldagi YTHlarda oʻtgan yili 15 nafar fuqaro vafot etgan va 50 nafar fuqarolar tan jarohati olgan.
Toshkent-Chorbogʻ yoʻlining ayrim qismlarida harakat 80 km/soatgacha cheklanadi.
Bu haqda Toshkent viloyati Xalq deputatlari Kengashining 2026 yil 2 fevraldagi qarorida aytiladi.
Qarorda Chorbogʻ yoʻnalishidagi yoʻllarda harakatlanish tezligini cheklash boʻyicha muhim oʻzgarishlar belgilangan.
Aytilishicha, Toshkent viloyati hududida joylashgan davlat ahamiyatiga ega “Bektemir sh.-Chirchiq sh.-Gʻazalkent sh.-Chorbogʻ qoʻrgʻoni” avtomobil yoʻlining 19-74 kilometrlari oraligʻida belgilangan tezlikka amal qilmaslik oqibatida 2025 yil 12 oyi davomida jami 63 ta yoʻl-transport hodisasi sodir etilgan.
Natijada 15 nafar fuqaro vafot etgan va 50 nafar fuqarolar tan jarohati olgan.
Hujjatga koʻra, 4R-12 "Bektemir sh. - Chirchiq sh. - Gʻazalkent sh. - Chorbogʻ qoʻrgʻoni" avtomobil yoʻlining aholi yashash joylaridan tashqari boʻlgan 6 ta qismida yuqori tezlik 80 km/soat etib belgilandi (ilgari 100 km/soat boʻlgan).
Cheklov oʻrnatilgan asosiy nuqtalar:
Yuqori Chirchiq tumani: 19-20 km oraligʻi (Bektemir va Chirchiq orasida).
Boʻstonliq tumani: * 44-45 km oraligʻi;
49-50 km oraligʻi;
52-53 km oraligʻi;
61-62 km oraligʻi;
64-65 km oraligʻi;
71-74 km (Gʻazalkentdan oʻtib Chorbogʻ tomonga ketishda).
