Bahodir Qurbonov OʻFA raisligiga qayta saylandi
U tadbirda korrupsiya masalasiga toʻxtaldi. "Biz futbolga oʻz qarindoshimizni olib kirib, boshqa isteʼdodlini koʻkragidan itardikmi, degan savolga javob berishimiz kerak", dedi OʻFA raisi.
30 yanvar kuni Toshkentda Oʻzbekiston futbol assotsiatsiyasining (OʻFA) navbatdagi hisobot-saylov kongressi boʻlib oʻtdi.
Kongress yakunlariga koʻra, Davlat xavfsizlik xizmati (DXX) raisi, general-polkovnik Bahodir Qurbonov delegatlarning bir ovozdan qabul qilgan qarori bilan OʻFA prezidenti lavozimiga qayta saylandi. U ushbu lavozimda 2025 yil fevral oyidan buyon ishlab kelayotgan edi.
Bahodir Qurbonov tadbirda korrupsiya masalasini koʻtardi.
"Biz futbolda oʻz qarindoshimizni olib kirib, boshqa isteʼdodlini koʻkragidan itardikmi, degan savolga javob berishimiz kerak. Oʻzbek futbolida korrupsiya omili boʻlmasa, futbolchi yetishtirishda, xalqaro maydonda oʻzbek gʻururini namoyish qilishda muvaffaqiyatga erishamiz", dedi u.
Oʻz navbatida Ravshan Ermatov OʻFA birinchi vitse-prezidenti, Odil Ahmedov esa vitse-prezident lavozimini saqlab qoldi.