Fargʻona viloyati IIBga yangi boshliq tayinlandi
Ichki ishlar vaziri ayrim hududlarda jinoyatchilik koʻrsatkichlari yuqori ekani, mahallalarda ishni tashkil etishda xato va kamchiliklarga yoʻl qoʻyilganini tanqid qilgan.
Ayubxon Rahmatullayev Fargʻona viloyati Ichki ishlar boshqarmasi boshligʻi etib tayinlandi. Tayinlovga qadar u Ichki ishlar vazirining birinchi oʻrinbosari — Tezkor qidiruv departamenti boshligʻi lavozimida ishlagan.
Viloyat hokimligida bugun Ichki ishlar vaziri Aziz Toshpoʻlatov, viloyat hokimi Xayrullo Bozorov, huquq-tartibot idoralari, boshqarma va tashkilotlar rahbarlari ishtirokida yigʻilish boʻlib oʻtgan.
Vazir viloyatda jinoyatchilikka qarshi kurashish, uning barvaqt oldini olish borasida muayyan ijobiy ishlar amalga oshirilganini aytib, ayrim hududlarda jinoyatchilik koʻrsatkichlari yuqori ekani, mahallalarda ishni tashkil etishda xato va kamchiliklarga yoʻl qoʻyilayotganini tanqid qilgan.
Fargʻonaning avvalgi IIB boshligʻi Aziz Ikromov Favqulodda vaziyatlar vaziri lavozimiga tayinlangan edi.