AQShda kuchli boʻron sabab kamida 7 kishi halok boʻldi
Bu ob-havo bir necha kun davom etishi mumkin va boʻron taxminan 180 million amerikalikka, yaʼni mamlakat aholisining yarmidan koʻprogʻiga taʼsir koʻrsatishi taxmin qilingan.
AQShda kuchli boʻron kamida 7 kishining hayotiga zomin boʻldi.
AQSh boʻylab tarqalgan kuchli qishki boʻron oqibatida kamida yetti kishi halok boʻldi, 800 mingdan ortiq xonadon elektr taʼminotisiz qoldi.
AQSh Mahalliy ob-havo xizmati maʼlumotiga koʻra, Texasdan tortib Yangi Angliyagacha choʻzilgan hayot uchun xavfli ob-havo sharoitlari tufayli mamlakat boʻylab maktablar va yoʻllar yopildi, koʻplab reyslar bekor qilindi.
Luiziana shtatida kamida ikki kishi gipotermiya oqibatida halok boʻlgan. Shuningdek, boʻron bilan bogʻliq oʻlim holatlari Texas, Tennessi va Kanzas shtatlarida ham qayd etilgan.
Maʼlumotlarga koʻra, 800 mingdan ortiq xonadon elektr taʼminotisiz qolgan. Shu bilan birga, Flight Aware xabariga koʻra, 11 mingdan ziyod aviareys bekor qilingan.
Keng hududlarda kuchli qor, qor aralash yomgʻir va muzli yomgʻir kuzatilmoqda. Muzli yomgʻir — sovigan yomgʻir tomchilari yerga yoki buyumlar ustiga tushishi bilan darhol muzlab qoladigan xavfli hodisadir.
Bu ob-havo bir necha kun davom etishi mumkin va boʻron taxminan 180 million amerikalikka — yaʼni mamlakat aholisining yarmidan koʻprogʻiga taʼsir koʻrsatishi taxmin qilinmoqda.
Luiziana sogʻliqni saqlash departamenti ikki nafar erkak gipotermiya sababli vafot etganini tasdiqladi.
Texas shtatining Ostin shahri meri sovuqqa duchor boʻlish bilan bogʻliq bir oʻlim holati qayd etilganini bildirdi.
Kanzas rasmiylarining aytishicha, qor ostidan topilgan ayol “ehtimol gipotermiya oqibatida vafot etgan”.
Tennessi shtatida ham ob-havo bilan bogʻliq uch nafar fuqaroning oʻlimi haqida xabar berilgan.
Nyu-York shahri meri Zoxran Mamdani X ijtimoiy tarmogʻidagi postida shaharda kamida besh kishi vafot etganini, biroq ularning oʻlim sababi hali aniqlanmaganini yozdi. Nyu-York shtati gubernatori Keti Xokul aholini uyda qolishga va yoʻllarga chiqmaslikka chaqirdi.
“Bu soʻnggi yillarda kuzatilgan eng sovuq ob-havo, eng sovuq qishki boʻrondir”, — dedi u. “Goʻyo Arktika qamali shtatimizni va mamlakatdagi koʻplab boshqa hududlarni egallab olgandek.”
Shtatlarning deyarli yarmi favqulodda holat eʼlon qilgan. Boʻron 27 yanvargacha davom etishi kutilayotgani sababli, mamlakat boʻylab maktablar darslarni bekor qilmoqda. Hodisa sabab AQSh Senati ham belgilangan ovoz berishni bekor qildi.