Sergelida qurol savdosi bilan shugʻullanuvchi shaxs ushlandi
Qidiruv ishlari davomida undan 17 xil turdagi turli pnevmatik qurollar topilib, musodara qilindi. Hozirda tergovga qadar tekshiruv boshlangan.
Sergeli tumanida noqonuniy qurol savdosi bilan shugʻullanuvchi shaxs aniqlandi.
Natijada qurolning noqonuniy aylanmasiga chek qoʻyilgan. Bu haqda poytaxt IIBB matbuot xizmati xabar bermoqda.
Ichki ishlar organlari xodimlari DXX bilan hamkorlikda maxsus tezkor tadbirlar oʻtkazdi. Tadbirlar davomida Sergeli tumanida yashovchi shaxs ushlandi.
U gaz pistolet va unga moʻljallangan gaz ballonlari hamda bitta uzun oʻqli pnevmatik miltiqni 2000 AQSh dollariga noqonuniy sotmoqchi boʻlgan. Qidiruv ishlari davomida undan yana 17 xil turdagi turli pnevmatik qurollar topilib, musodara qilindi. Ushbu holat yuzasidan tergovga qadar tekshiruv oʻtkazilmoqda.
Shuningdek, olingan tezkor maʼlumotlarga asosan, Chilonzor tumanida yashovchi fuqaro uyida hujjatsiz ov miltiqi saqlayotgani aniqlandi. Erkak miltiqni ariqdan topganini, lekin uni huquq-tartibot organlariga topshirmaganligini aytdi.
Unga nisbatan Oʻzbekiston Respublikasi Jinoyat kodeksining "Oʻqotar qurolning, oʻq-dorilarning, oʻqotar qurol asosiy qismlarining, portlovchi moddalarning, portlatish vositalarining yoki portlatish qurilmalarining qonunga xilof muomalasi" moddasiga asosan jinoyat ishi qoʻzgʻatildi.
Uchinchi holatda esa, Uchtepa tumanida vafot etgan qarindoshining uyida taʼmir ishlarini olib borayotgan erkak 200 dona jangovar patron topdi. Shundan soʻng u patronlarni ichki ishlar organlari xodimlariga ixtiyoriy ravishda topshirdi. Patronlar ekspertizaga yuborildi.