Yaponiya sobiq bosh vazirini otib oʻldirgan shaxs umrbod qamaldi

Yaponiyani larzaga solgan suiqasd ishi yakunlandi: sobiq bosh vazir Sindzo Abeni oʻldirgan shaxsga umrbod qamoq jazosi berildi.

Yaponiya sudi sobiq bosh vazir Sindzo Abeni 2022 yilda oʻldirgan Tetsuya Yamagamini qotillik va qurolga oid qonunlarni buzishda aybdor deb topib, umrbod qamoq jazosiga hukm qildi.

Yaponiyaning eng uzoq muddat (2006-07 va 2012-2020) bosh vazirlik qilgan rahbari Sindzo Abeni suiqasd oqibatida oʻldirgan erkak umrbod qamoq jazosiga hukm qilindi.

Bu ish mamlakatni larzaga solgan va siyosiy zoʻravonlik hamda kengroq ijtimoiy muammolar yuzasidan qizgʻin bahslarni keltirib chiqargan jarayonga nuqta qoʻydi.

45 yoshli Tetsuya Yamagami Yaponiyaning gʻarbiy qismidagi Nara shahrida joylashgan tuman sudida qotillik va qurol nazorati toʻgʻrisidagi qonunlarni buzish kabi bir qator jinoyatlarda aybdor deb topildi. U 2022 yilda Narada boʻlib oʻtgan saylovoldi mitingida Sindzo Abeni qoʻlbola qurol bilan otib oʻldirganini tan olgan edi. Biroq uning advokatlari yengilroq jazo soʻragan.

Qisqa muddat Yaponiya Oʻzini-oʻzi mudofaa kuchlarida xizmat qilgan Yamagami ishi yapon jamiyatini ikkiga boʻldi. Baʼzilar uning ogʻir oʻtgan bolaligi sabab unga hamdardlik bildirdi, boshqalar esa Yaponiya siyosatidagi yirik arbob boʻlgan, 2020 yilda lavozimini tark etgan 67 yoshli Abeni oʻldirgani uchun unga eng ogʻir jazo berilishi kerakligini taʼkidladi.

Abe Nara shahridagi temiryoʻl bekati yaqinida kichik siyosatchi uchun targʻibot olib borayotgan paytda boʻynidan oʻq yegan edi.

Taxminan ikki oy davom etgan sud jarayonida Yamagami Abega qarata oʻq uzganini tan oldi. Bunga sabab sifatida Abe Janubiy Koreyada joylashgan va Yaponiyada keng faoliyat yurituvchi “Birlashtiruvchi cherkov”ni qoʻllab-quvvatlaganini maʼlum qildi.

Uning aytishicha, cherkov aʼzosi boʻlgan onasi hayot jamgʻarmasini topshirishga majbur boʻlib, bu oilani bankrotlikka olib kelgan.

Yaponiyada siyosiy zoʻravonlik va otishmalar kam uchraydigan holat boʻlgani sababli sud jarayoni katta qiziqish uygʻotdi. Bunday darajadagi soʻnggi suiqasd 1936 yilda, imperator armiyasi toʻntarishi paytida ikki sobiq bosh vazir oʻldirilganida sodir boʻlgan.

Bugun boʻlib oʻtgan sudda qariyb 700 kishi sud binosi oldida navbatga turib, sud zaliga kiritiladigan 33 nafar tomoshabin qatoridan joy olishga umid qildi.

Suiqasd “Birlashtiruvchi cherkov”ga boʻlgan eʼtiborni yana kuchaytirdi. Jamoatchilik bosimidan soʻng Yaponiya hukumati cherkovning mablagʻ yigʻish amaliyotlarini tekshirishni boshladi.

2006–2007 va 2012–2020 yillarda bosh vazir boʻlgan Sindzo Abe millatchi siyosatchilar oilasidan chiqqan edi. U bosh vazir sifatida urushdan keyingi tinchliksevar siyosatni yumshatib, Yaponiyaning harbiy imkoniyatlarini kengaytirishga intildi.

Agressiv moliyaviy ragʻbatlantirish orqali iqtisodiy turgʻunlikdan chiqishga harakat qildi. U hozirgi bosh vazir Sanaye Takaichi uchun ham ustoz boʻlgan.