Toshkentda 61 gektardan oshiq yer oʻzboshimchalik bilan egallab olingani aniqlandi
Yerlarni qaytarish va ularda qurilgan imoratlarni bartaraf etish boʻyicha sudlarga 1 622 ta daʼvo arizalari kiritildi.
Toshkentda 61 gektardan oshiq yer oʻzboshimchalik bilan egallab olingani aniqlangan.
Kadastr agentligi Toshkent shahar boshqarmasi va uning tumanlardagi boʻlim xodimlari tomonidan 2025 yilda oʻtkazilgan yer va kadastr nazorati tadbirlari natijasida 3 927 ta holatda 61,25 gektar yerlar oʻzboshimchalik bilan egallab olinganligi aniqlangan.
Berilgan yozma koʻrsatmalar, olib borilgan tushuntirish ishlari natijasida 2 764 ta yer qonunbuzilish holati fuqarolar tomonidan ixtiyoriy ravishda bartaraf etilishiga erishilgan.
Yer uchastkalarini qaytarish va ularda qurilgan imoratlarni bartaraf etish boʻyicha sudlarga 1 622 ta daʼvo arizalari kiritilgan.
Huquqbuzarlik holatida jinoyat alomatlari mavjud boʻlgan 34 ta ish hujjati oʻrnatilgan tartibga muvofiq prokuratura organlariga yuborilgan.
Yuqoridagi oʻzboshimchalik bilan egallab olingan holatlar Oʻzbekiston Respublikasining 937-son Qonuni talablariga mutanosib boʻlmagani uchun ham ushbu joylarda yer va kadastr nazorati tadbirlari amalga oshirilgan.
Yerlarni oʻzboshimchalik bilan egallash, noqonuniy qurilmalar qurib olish maʼmuriy yoki jinoiy javobgarlikka sabab boʻladi.