Qozogʻistonda parlament bir palatali boʻladi va "Qurultoy" deb ataladi
Prezident Qosim-Joʻmart Toʻqayev vitse-prezident lavozimi joriy etilishini eʼlon qildi. Vitse-prezidentning vazifalari boʻyicha asosiy qoidalar Konstitutsiyada aks ettiriladi.
Qozogʻiston prezidenti Qosim-Joʻmart Toʻqayev parlament tizimida keng koʻlamli oʻzgarishlarni eʼlon qildi.
Boʻlajak bir palatali parlament "Qurultoy" deb oʻzgartirilishi mumkin va Davlat maslahatchisi lavozimi bekor qilinadi.
Qosim-Joʻmart Toʻqayev kelajakda parlament nomini oʻzgartirishni taklif qildi. Uni "Qurultoy" deb atalishi kutilmoqda. Bu hozirda Qiziloʻrda shahrida boʻlib oʻtayotgan beshinchi Milliy Qurultoyda muhokama qilindi.
"Men kelajakdagi parlament nomi haqida oʻz fikrimni bildirmoqchiman. Menimcha, uni Qurultoy deb atash kerak. Qurultoyning tarixiy koʻlami va ahamiyati aniq va xalqimizga yaqin. Oʻzim 2022 yilda Qurultoyni tiklash tashabbusi bilan chiqqanman. Ushbu hisobotning boshida men uning ishining samaradorligi va foydaliligiga eʼtibor qaratdim. Umuman olganda, menimcha, biz siyosiy tizimdagi muhim davlat institutining ramzi sifatida "Qurultoy" nomini saqlab qolishimiz kerak", dedi prezident.
Toʻqayev kelajakdagi bir palatali Qurultoyga kadrlarni tayinlash boʻyicha yangi vakolatlar berishni taklif qildi.
Qozoq yetakchisi shuningdek, yangi hukumat lavozimini — vitse-prezident lavozimini eʼlon qildi.
"Biz vitse-prezident institutini tashkil etish haqida gapiryapmiz. Davlat rahbari oʻz vakolatlari doirasini oʻzi belgilaydi. Vitse-prezident prezidentning koʻrsatmalariga binoan xalqaro forumlarda va boshqa mamlakatlar delegatsiyalari bilan muzokaralarda Qozogʻiston Respublikasi manfaatlarini himoya qiladi, parlamentda prezidentning manfaatlarini himoya qiladi, ichki va qoʻshma ijtimoiy-siyosiy, ilmiy, madaniy va taʼlim tashkilotlari bilan hamkorlik qiladi va prezidentning boshqa koʻrsatmalarini bajaradi deb taxmin qilinadi", - dedi davlat yetakchisi.
Vitse-prezidentning vazifalariga oid asosiy qoidalar Konstitutsiyada aks ettiriladi.
Toʻqayev qoʻshimcha qilishicha, davlat maslahatchisi lavozimi bekor qilinadi. Eslatib oʻtamiz, davlat maslahatchisi lavozimini hozirda Yerlan Karin egallab turibdi.