"Yangi bank" faoliyati tugatiladi
Bankning 32 ming nafardan oshiq omonatchisiga kafolatlangan omonat summasi toʻliq qaytariladi.
Yangi bank” aksiyadorlik jamiyati faoliyati tugatiladi. Bu haqda Markaziy bank xabar berdi.
Markaziy banki Boshqaruvining 2026 yil qarorlari boʻyicha bank faoliyatida aniqlangan kamchiliklarni bartaraf etish boʻyicha koʻrilgan choralar yetarli darajada samara bermagani, jumladan, ustav kapitali miqdorini qonunchilikda belgilangan eng kam talablar darajasiga yetkazilmaganligi, shuningdek, banklar va bank faoliyati toʻgʻrisidagi qonunchilikda nazarda tutilgan ayrim talablar bajarilmaganligi sababli qabul qilindi.
“Oʻzbekiston Respublikasining Markaziy banki toʻgʻrisida”gi, “Banklar va bank faoliyati toʻgʻrisida”gi hamda “Banklarni sanatsiya qilish va tugatish toʻgʻrisida”gi qonunlarga muvofiq, bank faoliyatini oʻrnatilgan tartibda tugatish belgilandi hamda tugatish komissiyasi tayinlanib unga tugatish ishlarini boshqarish vakolatlari oʻtkazildi.
Alohida taʼkidlanishicha, dastlabki hisob-kitoblarga koʻra, bankning 32 526 nafar omonatchisidan 32 153 nafar omonatchiga kafolatlangan omonat summasi toʻliq qaytariladi (omonatlarni toʻlash boʻyicha aniq hisob-kitoblar Omonatlarni kafolatlash agentligi tomonidan eʼlon qilinadi).
373 nafar omonatchi boʻyicha kafolatlangan mablagʻlarning qolgan qismi tugatish komissiyasi qaroriga asosan qaytariladi.
"Ushbu masala Markaziy bankning doimiy nazoratida. Jarayon bosqichma-bosqich kuzatib boriladi va jamoatchilik muntazam ravishda xabardor qilinadi," - deya taʼkidlaydi Markaziy bank.