Eron havo hududi yopilishi oqibatida ayrim samolyotlar ortga qaytdi
Ular ichida Oʻzbekiston shaharlarini Madina, Jidda va Kuvayt bilan bogʻlovchi qator aviareyslar bor.
Eron havo hududi yopilishi oqibatida Oʻzbekistonga va Oʻzbekistondan amalga oshirilayotgan bir nechta aviareyslar oʻz yoʻnalishini oʻzgartirib, joʻnab ketgan aeroportlariga qaytishga majbur boʻldi. Bu haqda Uzbekistan Airports matbuot xizmati xabar berdi.
Xususan, quyidagi yoʻnalishlarda samolyotlar ortga qaytgan:
Fly One Asia: Madina — Toshkent (7Q7742) va Madina — Fargʻona (7Q4442) yoʻnalishlari boʻyicha reyslar Madina aeroportiga qaytdi.
Jazeera Airways: Toshkent — Kuvayt (J9650) reysi Toshkent vaqti bilan soat 02:01 da havoga koʻtarilgan boʻlsa-da, yana poytaxt aeroportiga qoʻnishga majbur boʻldi.
Sam Air: Samarqand — Jidda (9S3303) yoʻnalishidagi reys soat 02:04 da Samarqanddan uchib ketib, birozdan soʻng yana ortga qaytgan.
Fly Khiva: Urganch — Madina (2U7911) reysi soat 02:17 da parvoz qilganiga qaramay, Urganch aeroportiga qaytib kelgan.
Uzbekistan Airways: Jidda — Toshkent (HY336) yoʻnalishidagi reys ham Eron havo hududi yopilgani sababli Jidda aeroportiga qaytgan.
Hozircha parvozlar jadvaliga kiritiladigan oʻzgarishlar va qayta tiklanish vaqti boʻyicha rasmiy maʼlumotlar berilmagan.
Eslatib oʻtamiz, avvaal Isroil hujumi sabab ham Eron havo hududi yopilgandi.