Eron havo hududi parvozlar uchun ochildi
AQShning ehtimoliy hujumi sabab yopilgan osmon sabab Oʻzbekistondan uchgan samolyotlar ham ortga qaytishga majbur boʻlgandi.
Eron havo hududi yana parvozlar uchun ochildi.
Eron Fuqaro aviatsiyasi tashkiloti maʼlumotlariga koʻra, havo hududi joʻnash, qoʻnish va tranzit reyslar uchun ochiq. Bayonot davlatga qarashli IRIB teleradiokompaniyasi tomonidan keltirildi.
Flightradar maʼlumotlariga koʻra, Eronning Sepehran Airlines, Fly Kish, Mahan Air, Meraj Airlines, Taban Airlines, Mehr Airways va Emirates, Etihad Airways, Flydubai, Air Arabia aviakompaniyalari, shuningdek, Turkiya, Oʻzbekiston va Tayvan aviakompaniyalari mamlakat boʻylab parvozlarni qayta tikladi.
Flightradar 15 yanvar kechasi Eron ustidagi havo hududi yopilgani haqida xabar berdi. Oʻzbekistondan uchgan qator reyslar ortga qaytarildi.
Eronda dekabr oyining oxiridan beri milliy valyutaning qulashi va narxlarning keskin koʻtarilishi sababli norozilik namoyishlari davom etmoqda. Namoyishchilar rejim oʻzgarishini talab qilmoqda.
14 yanvar oqshomida Reuters manbalarga tayanib, AQSh 24 soat ichida Eronga zarba berishi mumkinligini xabar qildi.