Yaponiyada fevralda muddatidan oldin saylovlar oʻtkazilishi mumkin

Yaponiya fevralda muddatidan oldin saylov oʻtkazishi mumkin.

Qaror bosh vazir Sanaye Takaichining rekord darajadagi reytingi fonida va iqtisodiy hamda tashqi siyosiy bosimlar kuchayib borayotgan bir paytda muhokama qilinmoqda.

Hafta oxirida Yaponiya OAVlarida chiqqan xabarlarga koʻra, Liberal demokratik partiya hukmron koalitsiyani barqarorlashtirish maqsadida Bosh vazir Sanaye Takaichining yuqori reytinglaridan foydalanmoqchi.

NHK maʼlum qilishicha, Yaponiya Ichki ishlar va kommunikatsiyalar vazirligi har bir saylov komissiyalariga ehtimoliy umumiy saylovlarga tayyorgarlik koʻrish boʻyicha koʻrsatma bergan.

Nikkei oʻtkazgan soʻrovga koʻra, Takaichining maʼqullanish darajasi tarixiy 75 foizga yetgan boʻlib, ketma-ket uchinchi oy 70 foizdan yuqori koʻrsatkich saqlanib qolmoqda.

Bu yuqori reytinglar Tokio va Pekin oʻrtasida yuzaga kelgan diplomatik keskinlik fonida qayd etilmoqda. Xususan, Takaichining noyabr oyida Xitoyning Tayvanga qarshi ehtimoliy harbiy harakati Yaponiya mudofaa kuchlarining aralashuviga sabab boʻlishi mumkinligi haqidagi bayonotlari bunga turtki boʻlgan.

Agar fevral oyida muddatidan oldin saylov eʼlon qilinsa, bu Takaichining bosh vazir sifatidagi faoliyatiga atigi toʻrt oy toʻlgan paytga toʻgʻri keladi. Shuningdek, bu LDPning kichik koalitsiya hamkori — Yaponiya Innovatsiyalar partiyasi (JIP) bilan birgalikda qatnashadigan ilk saylovi boʻladi.

LDP va JIP quyi palatada 230 oʻringa ega. Uch nafar mustaqil deputat qoʻshilgach, hukmron koalitsiya 465 oʻrinli palatada ozgina ustunlikni qoʻlga kiritgan.

Biroq koalitsiya Yaponiya parlamentining yuqori palatasida ozchilikni tashkil etadi — 250 oʻrindan atigi 119 tasi ularga tegishli.

Muxolifat hukumat almashuvini vaʼda qilmoqda.

Alohida ravishda, Yaponiya Konstitutsion-demokratik partiyasi (CDP) yetakchisi Yosihiko Noda NHKʼga bergan intervyusida hukmron koalitsiyani hokimiyatdan chetlatishga vaʼda berdi. U, shuningdek, LDPning sobiq koalitsiya hamkori Komeito bilan ittifoq tuzilishi ehtimolini ham tilga oldi.

Yaponiyadagi eng yirik muxolifat partiyasi boʻlgan CDP quyi palatada 148 oʻringa ega, Komeito esa 24 oʻrinni nazorat qiladi.

Lavozimga kirishganidan buyon Takaichi zaiflashib borayotgan iyena, yuqori inflyatsiya va sust iqtisodiyot bilan yuzlashib kelmoqda.

Iyena hozirda dollarga nisbatan bir yil ichidagi eng past darajaga tushib, dushanba kuni 1 dollar uchun 158,19 iyenani tashkil etdi. Yaponiyada inflyatsiya Yaponiya Markaziy banki belgilagan maqsaddan ketma-ket 44 oy davomida yuqori boʻlib kelmoqda.

Uchinchi chorak boʻyicha qayta koʻrib chiqilgan YaIM maʼlumotlariga koʻra, Yaponiya iqtisodiyoti dastlabki koʻrsatkichlarga qaraganda koʻproq qisqargan: choraklar kesimida 0,6 foizga, yillik hisobda esa 2,3 foizga kamaygan.