Indoneziya va Malayziya Grok sunʼiy intellekt tizimini blokladi
Bu ayollar va voyaga yetmaganlar ishtirokidagi soxta pornografik kontent yaratilishi va tarqalishi boʻyicha xavotirlar bilan bogʻliq.
Indoneziya va Malayziya Grok sunʼiy intellekt tizimini blokladi.
Ayollar va voyaga yetmaganlar ishtirokidagi soxta pornografik kontent yaratilishidan xavotir bildirgan Indoneziya va Malayziya rasmiylari Grok sunʼiy intellekt tizimiga kirishni vaqtincha toʻxtatdi.
Bu choralar realistik tasvirlar, ovoz va matn yaratishga qodir generativ sunʼiy intellekt vositalari boʻyicha butun dunyoda kuchayib borayotgan xavotirlarni aks ettiradi. Chunki mavjud himoya mexanizmlari ularning suiisteʼmol qilinishining oldini olishga yetarli darajada qodir emas.
Ilon Maskga tegishli X ijtimoiy tarmogʻi orqali foydalaniladigan Grok chat-boti ayollarni bikini yoki jinsiy mazmundagi holatlarda tasvirlash, shuningdek bolalar ishtirokidagi obrazlarni yaratish kabi manipulyatsiyalangan rasmlar yaratgani uchun keng tanqidga uchradi.
Janubi-Sharqiy Osiyodagi ikki davlat mavjud nazorat choralariga qaramay, ayollar va voyaga yetmaganlar ishtirokidagi soxta pornografik kontent yaratilishi va tarqalishining oldi olinmayotganini maʼlum qildi. Indoneziya hukumati 10 yanvar kuni Grokʼga kirishni vaqtincha blokladi, undan keyin yakshanba kuni Malayziya ham xuddi shunday qaror qabul qildi.
“Roziliksiz yaratilgan jinsiy dipfeyklar hukumat tomonidan inson huquqlari, qadr-qimmat va fuqarolarning raqamli makondagi xavfsizligiga jiddiy tajovuz sifatida baholanadi”, — dedi Indoneziya Aloqa va raqamli masalalar vaziri Meutya Hafid oʻz bayonotida.
Vazirlikning taʼkidlashicha, ushbu chora sunʼiy intellekt yordamida yaratilgan soxta pornografik kontentdan ayollar, bolalar va keng jamoatchilikni himoya qilishga qaratilgan.
Kuala-Lumpurda Malayziya Aloqa va multimedia komissiyasi kecha Grokʼga vaqtinchalik cheklov joriy qildi.
Regulyatorning bildirishicha, shu oy X Corp. va xAIʼga kuchliroq himoya mexanizmlarini joriy etish talabi bilan yuborilgan ogohlantirishlarga asosan foydalanuvchi shikoyatlariga tayanilgan javoblar olingan.
“Cheklov huquqiy va tartibga solish jarayonlari davom etayotgan bir paytda oldini oluvchi va mutanosib chora sifatida joriy etildi”, — deyiladi bayonotda. Samarali himoya vositalari joriy etilmaguncha Grokʼga kirish yopiq qolishi qoʻshimcha qilindi.
2023 yilda ishga tushirilgan Grok X platformasida bepul foydalanish uchun ochiq. Foydalanuvchilar undan savollar berishlari, shuningdek oʻzlari yaratgan postlarni yoki boshqa foydalanuvchilarning postlariga yozilgan javoblarni belgilashlari mumkin.
Oʻtgan yozda kompaniya Grok Imagine nomli tasvir generatorini ishga tushirdi, unda kattalar uchun kontent yaratishga imkon beruvchi “spicy mode” ham mavjud edi.
Janubi-Sharqiy Osiyodagi cheklovlar Grok atrofidagi tanqidlar Yevropa Ittifoqi, Buyuk Britaniya, Hindiston va Fransiyada ham kuchayib borayotgan bir paytga toʻgʻri keldi.
Oʻtgan hafta Grok dipfeyklar sabab yuzaga kelgan global norozilikdan soʻng tasvir yaratish va tahrirlash funksiyalarini faqat pullik foydalanuvchilar bilan chekladi. Biroq tanqidchilar bu muammoni toʻliq hal qilmaganini taʼkidlashmoqda.