Fargʻonada avtomobil bakidan 11 kgdan oshiq narkotik topildi
Bundan tashqari 6945 dona kuchli taʼsir qiluvchi dori vositalari ham yashirilgan.
Avtomashina yoqilgʻi baki ichiga yashirilgan narkotik moddalar fosh boʻldi.
Fargʻona viloyatining Beshariq tumanida joylashgan “Ravot” chegara-bojxona postida tekshiruv oʻtkazildi. Unda Tojikiston Respublikasidan kirib kelgan, Oʻzbekiston tumanida yashovchi, 1979 y.t. fuqaro boshqaruvidagi “Lasetti” rusumli avtotransport vositasi Davlat xavfsizlik xizmatining Chegara qoʻshinlari harbiy xizmatchilari va Fargʻona viloyati boʻyicha boshqarmasi xodimlari hamda Bojxona organlari xodimlari hamkorligida oʻrganilgan.
Natijada, avtomashinaning yoqilgʻi baki ichiga sof ogʻirligi 10 kg. 739 gr. “gashish”, 412 gr. “marixuana” va 35 gr. “opiy” giyohvandlik vositalari hamda 6945 dona “Royal” kuchli taʼsir qiluvchi dori vositalari yashirilganligi aniqlanib, tegishli tartibda rasmiylashtirib olindi.
Hozirda holat yuzasidan mazkur shaxsga nisbatan Jinoyat Kodeksining 246-moddasi 2-qismi va 25,273-moddasi 5-qismi bilan jinoyat ishi qoʻzgʻatilib, “qamoq” ehtiyot chorasi qoʻllanildi.
Tergov doirasida uning jinoiy aloqalarini aniqlash boʻyicha zarur chora-tadbirlar amalga oshirilmoqda.
Avvalroq Toshkentda hokimiyat mutaxassisi pora bilan ushlangandi.
U Uchtepa tumani hududida buzilishi lozim boʻlgan savdo doʻkonlari va boshqa manzillar roʻyxati tuzilayotganligini roʻkach qilib, tadbirkordan pul olgan.