AQSh Rossiyaning neft tankerini qoʻlga oldi

AQSh Venesuelaga hujumi doirasida Rossiyaning neft tankerini qoʻlga oldi.

Mamlakatning yuqori martabali qonunchilaridan biri esa bu harakatni “ochiqdan-ochiq qaroqchilik” deb atadi.

Rossiya Transport vazirligining aytishicha, AQSh harbiy-dengiz kuchlari Venesueladan kelayotgan neft eksportini toʻsish doirasida Rossiyaning "Marinera" nomli kemasiga chiqib olganidan soʻng, kema bilan aloqa uzilgan.

Vazirlik bayonotida shunday deyiladi:

“1982 yilgi BMTning Dengiz huquqi toʻgʻrisidagi konvensiyasiga muvofiq, ochiq dengizda suzish erkinligi amal qiladi va hech bir davlat boshqa davlat yurisdiksiyasida qonuniy roʻyxatdan oʻtgan kemalarga nisbatan kuch ishlatishga haqli emas.”

Rossiya AQShdan ekipaj aʼzolariga insoniy va munosib munosabatda boʻlishni hamda ularni tez fursatda vataniga qaytarishni taʼminlashni talab qilmoqda. Bu haqda TASS davlat axborot agentligi Tashqi ishlar vazirligiga tayanib xabar berdi.

Avval “Bella-1” nomi bilan tanilgan “Marinera” kemasi ilgari Karib dengizida sanksiya ostidagi tankerlar uchun oʻrnatilgan AQSh dengiz blokadasidan yashirincha oʻtishga muvaffaq boʻlgan edi.

Mazkur blokada AQShning Venesuelaga qarshi bosim siyosatining bir qismi boʻlib, u 3 yanvar kuni prezident Donald Tramp AQSh maxsus kuchlarini yuborib, Venesuela prezidenti Nikolas Maduroni qoʻlga oldirib, uni giyohvand moddalar savdosi boʻyicha ayblovlar yuzasidan Nyu-Yorkka olib kelish bilan yakunlandi. Maduro bu ayblovlarni rad etgan.

“Huquqni muhofaza qilish amaliyoti” davomida Venesuelada oʻnlab odamlar halok boʻlganidan soʻng, AQSh ochiq dengizda ochiqdan-ochiq qaroqchilik bilan shugʻullandi”, — deb yozdi Telegramda hukmron “Yagona Rossiya” partiyasidan deputat Andrey Klishas.

Ismini oshkor etmaslik sharti bilan gapirgan ikki nafar AQSh rasmiysi harbiy-dengiz amaliyoti AQSh Sohil qoʻriqlash xizmati va harbiy kuchlar tomonidan amalga oshirilganini aytdi. Ularning soʻzlariga koʻra, hudud yaqinida Rossiyaning harbiy kemalari, jumladan suvosti kemasi ham boʻlgan, biroq AQSh va Rossiya harbiy kuchlari oʻrtasida toʻqnashuv boʻlgani haqida hech qanday maʼlumot yoʻq.

Moskva va Vashington oʻrtasidagi munosabatlar Rossiya 2022 yil fevralida Ukrainaga bostirib kirganidan soʻng Sovuq urushdan beri eng yomon holatga tushgan edi. Biroq Tramp oʻtgan yili ikkinchi muddatiga kirishib, prezident Vladimir Putin bilan mojaroni tugatish yoʻllarini izlash maqsadida muloqot boshlagach, munosabatlar biroz yumshagan.

Yadro quroliga ega davlatlar oʻrtasida harbiy hodisalar kam uchraydi. 2023 yil mart oyida AQSh harbiy razvedka droni Rossiya qiruvchi samolyotlari tomonidan tutib qolingach Qora dengizga qulagan, bu esa Vashingtonning noroziligiga va keskinlashuv xavfi haqida ogohlantirishiga sabab boʻlgan edi.

Venesuela yetakchisi Maduro Rossiyaning soʻnggi bir yildan sal oshiq vaqt ichida agʻdarilgan ikkinchi yaqin ittifoqchisi boʻldi. Bungacha 2024 yil dekabrida Suriya prezidenti Bashar al-Asad hokimiyatdan chetlatilgan edi.

Rossiya dushanba kuni muvaqqat prezident sifatida qasamyod qilgan Delsi Rodrigesni qoʻllab-quvvatlashini va Moskva ochiq-oydin neokolonial tahdidlar hamda tashqi qurolli tajovuz deb atagan holatlar qarshisida Venesuelaga yordam berishda davom etishini maʼlum qildi.

Rossiyada Yangi yil bayramlari hali ham davom etayotgan bir paytda, prezident Vladimir Putin Maduroni hokimiyatdan chetlatish boʻyicha AQSh harakatlariga hozircha omma oldida izoh bermadi.