Shimoliy Koreya gipertovushli raketalar sinovini oʻtkazdi
Kim Chen In mashqlarni shaxsan kuzatgan. Bu Venesuela voqealari fonida roʻy berdi.
Shimoliy Koreya gipertovushli raketalarni uchirish mashqlarini oʻtkazdi, deb xabar berdi Markaziy axborot agentligi.
Agentlik maʼlumotlariga koʻra, sinovlar Pxenyanning Ryokpo hududidan amalga oshirildi.
Raketalar Yaponiya dengizida 1000 kilometr uzoqlikdagi nishonlarga zarba berdi.
Shimoliy Koreya yetakchisi Kim Chen In mashqlarni shaxsan kuzatdi. U sinovlar "muhim mudofaa va texnik vazifa"ni bajarganini taʼkidladi va yadroviy toʻxtatuvchi kuchlarni yaratishni strategik ustuvor vazifa deb atadi.
Janubiy Koreya ommaviy axborot vositalarining xabar berishicha, 4 yanvar kuni ertalab Shimoliy Koreya Yaponiya dengizi tomon bir nechta ballistik raketalarni uchirdi. Raketalar Pxenyan yaqinidan uchirildi va taxminan 900 kilometr masofani bosib oʻtdi.
Janubiy Koreya rasmiylari raketa uchirilishiga javoban milliy xavfsizlik masalalari boʻyicha favqulodda yigʻilish oʻtkazdi.