Tramp Venesuela prezidenti qoʻlga olinganini eʼlon qildi
Maduro va uning rafiqasi ushlanib, mamlakatdan olib chiqilgan.
AQSh prezidenti Donald Tramp Venesuela prezidenti Maduro va uning rafiqasi qoʻlga olinib, mamlakatdan olib ketilganini maʼlum qildi.
AQSh prezidenti Donald Tramp bugun Venesuelada amalga oshirilgan AQSh zarbalari haqida fikr bildirdi. U bu haqda Truth Social tarmogʻida yozgan.
“Amerika Qoʻshma Shtatlari Venesuela va uning yetakchisi, prezident Nikolas Maduroga qarshi keng koʻlamli zarbani muvaffaqiyatli amalga oshirdi, u rafiqasi bilan birga qoʻlga olinib, mamlakatdan olib ketildi.
Ushbu operatsiya AQSh huquqni muhofaza qilish organlari bilan hamkorlikda oʻtkazildi. Tafsilotlar keyinroq eʼlon qilinadi. Bugun soat 11:00 da Mar-a-Lagoda matbuot anjumani boʻlib oʻtadi. Eʼtiboringiz uchun tashakkur! Prezident Donald Tramp”, deyiladi bayonotda.
Avvalroq AQSh kuchlari Venesuela poytaxtiga hujum boshlagani xabar berilgandi.
Karakasda portlash va otishma ovozlari eshitilgan.
