Rossiya Eronning uch sunʼiy yoʻldoshini orbitaga uchirdi

Rossiya "Vostochniy" kosmodromidan Eronning "Paya", "Kovsar" va "Zafar-2" sunʼiy yoʻldoshlarini 500 kilometr balandlikdagi orbitaga muvaffaqiyatli joylashtirdi.

Bu iyuldan beri amalga oshirilayotgan ikkinchi shunday uchirish boʻlib, ikki davlat oʻrtasidagi strategik hamkorlikning kuchayayotganidan darak beradi.

Xabarga koʻra, Rossiya raketasi Sharqiy Rossiyadagi "Vostochniy" kosmodromidan sunʼiy yoʻldoshlarni uchirib, ularni Yer atrofida 500 kilometr balandlikdagi orbitaga joylashtirgan. Ushbu uchta sunʼiy yoʻldosh "Paya"," Kovsar" va "Zafar-2" deb nomlangan.

Hisobotga koʻra, ogʻirligi 150 kilogramm boʻlgan "Paya" sunʼiy yoʻldoshi hozirga qadar Eron orbitaga chiqargan eng ogʻir sunʼiy yoʻldosh hisoblanadi. "Kovsar" 35 kilogramm, "Zafar-2" ning ogʻirligi esa hisobotda koʻrsatilmagan.

Sunʼiy yoʻldoshlar 3 metrga qadar aniqlikdagi suratlarni olish imkoniyatiga ega boʻlib, ular suv resurslarini boshqarish, qishloq xoʻjaligi va atrof-muhitni nazorat qilishda qoʻllanilishi mumkin. Ularning xizmat muddati besh yilgacha deb baholanmoqda.

Rossiya vaqti-vaqti bilan Eron sunʼiy yoʻldoshlarini orbitaga chiqarib turadi, bu ikki davlat oʻrtasidagi kuchli aloqalarni namoyish etadi. Iyul oyida ham Rossiya raketasi Eronning "Nahid-2" aloqa sunʼiy yoʻldoshini orbitaga chiqargan edi.

Rossiya yanvar oyida Eron bilan strategik sheriklik shartnomasini imzolagan edi va iyun oyida 12 kun davom etgan havo urushi chogʻida Isroil hamda AQSh tomonidan Eronga qaratilgan hujumlarni keskin qoralagan edi. Ushbu hujumlarda qariyb 1100 eronlik halok boʻlgan. Javob tariqasida Eron tomonidan uyushtirilgan raketa zarbalari oqibatida Isroilda 28 kishi halok boʻldi.

Uzoq muddatli loyiha sifatida Eron vaqti-vaqti bilan oʻz sunʼiy yoʻldosh tashuvchilarini uchirib, sunʼiy yoʻldoshlarini kosmosga chiqarib keladi.

AQSh esa Eronning sunʼiy yoʻldosh uchirishlarini BMT Xavfsizlik Kengashi rezolyutsiyasiga zid deb hisoblab, yadro qurolini yetkazib bera oladigan ballistik raketalar bilan bogʻliq har qanday faoliyatdan tiyilish kerakligini aytgan. Eronning ballistik raketa dasturiga doir BMT sanksiyalari 2023 yilda muddati tugagan.