Davlat xaridlarini sunʼiy intellekt asosida hisoblovchi modul ishga tushadi

Davlat xaridlari tizimida raqobat va shaffoflik taʼminlanadi.

“Davlat xaridlari tizimida raqobat muhiti va shaffoflikni taʼminlash boʻyicha navbatdagi chora-tadbirlar toʻgʻrisida”gi Prezident Farmoni (PF–259-son, 26.12.2025 y.) qabul qilindi.

Farmonga koʻra, 2026 yil 1 martdan davlat xaridlari boʻyicha maxsus axborot portalida davlat xaridi predmetining oʻrtacha bozor narxini sunʼiy intellekt texnologiyalari asosida hisoblab beruvchi elektron modul ishga tushiriladi.

2026 yil 1 yanvardan davlat xaridlarida raqobatli usul orqali ayrim turdagi tovarlarni (ishlarni, xizmatlarni) xarid qilishning “taklif soʻrovi” yangi tartib-taomili joriy etiladi.

2026 yil 1 yanvardan:

- Toʻgʻridan-toʻgʻri shartnomalar boʻyicha xarid qilinadigan tovarlar (ishlar, xizmatlar) roʻyxati bekor qilinib, mazkur roʻyxat boʻyicha davlat xaridlari raqobatli usullardan foydalangan holda amalga oshiriladi;

- “Davlat xaridlari toʻgʻrisida”gi Qonunga muvofiq toʻgʻridan-toʻgʻri shartnomalar tuzishga ruxsat berish haqida normativ-huquqiy hujjatlar loyihalarini ishlab chiqishda davlat xaridi ijrochisining nomi aniq koʻrsatiladi;

- davlat xaridlarida elektron doʻkonga ofertalarni joylashtirish muddati 15 kundan 60 kungacha uzaytiriladi hamda tovarlarni yetkazib berish muddati kamida 5 kun etib belgilanadi;

- Loyihalar va import kontraktlarini kompleks ekspertiza qilish markazida xarid hujjatlarini ekspertizadan oʻtkazish muddatlari ularning qiymati va murakkabligidan kelib chiqib qisqartiriladi.

Farmonga koʻra, 2026 yil 1 yanvardan:

- davlat buyurtmachilarining xarid rejalari eʼlon qilingandan keyin ushbu maʼlumotlar avtomatik ravishda mahalliy ishlab chiqaruvchilarga elektron xabarnoma tarzida yuboriladi;

- byudjet buyurtmachilari hamda mahalliy ishlab chiqaruvchilar oʻrtasida oʻtkaziladigan mahalliy auksion savdolarini oʻtkazish yoʻlga qoʻyiladi.

- boshlangʻich narxni pasaytirish uchun oʻtkaziladigan auksionda 1 ta tadbirkor ishtirok etgan taqdirda, auksion oʻtkazilgan deb hisoblanadi.

2026 yil 1 iyuldan quyidagilar joriy etiladi:

- davlat xaridlariga oid takliflarni davlat xaridlari elektron tizimi orqali faqat elektron shaklda baholash;

- davlat buyurtmachilari tomonidan tovarlarni (ishlarni, xizmatlarni) qabul qiluvchi shaxslarga ishonchnomalarni davlat xaridlari elektron tizimi orqali elektron koʻrinishda rasmiylashtirish.

Quyidagi mexanizmlarni nazarda tutuvchi “Davlat xaridlarida nazorat” sahifasi joriy etiladi:

- davlat xaridlari sohasiga oid huquqbuzarliklar vujudga kelishi mumkin boʻlgan xavflarning yagona tasnifini shakllantirish;

- xavf-xatarlarni toifalarga ajratish, shuningdek, ularni avtomatik aniqlash va xabardor qilish;

- davlat buyurtmachilarini sodir etgan huquqbuzarliklariga koʻra toifalarga ajratish;

- davlat xaridlarida eng muhim samaradorlik koʻrsatkichlarini oʻz ichiga oluvchi “Xaridlarda KPI” raqamli reytingini joriy qilish.