Poytaxt hokimligi "rezidentlar ruxsatnomasi"ga izoh berdi
Koʻp qavatli uylar oraligʻi, hovlilar va toʻxtab turish taqiqlanmagan boshqa bepul hududlarda avtomobil saqlash uchun hech qanday toʻlov yoki ruxsatnoma talab qilinmaydi.
Poytaxt hokimligi rezidentlar uchun pullik avtoturargohlar boʻyicha izoh berdi.
Tarmoqlarda Toshkent shahar hokimining 2025 yil 25 dekabrdagi qarori muhokamalarga sabab boʻlmoqda.
Mazkur qarorni "Endi odamlar oʻz uyi oldida mashina qoʻygani uchun pul toʻlaydi" deya talqin etilgan.
Toshkent shahar hokimligiga koʻra, ushbu talqinlar haqiqatga zid boʻlib, qarorning mazmuni quyidagicha izohlanadi:
Yangi joriy etilayotgan tartib faqat yoʻl boʻyida tashkil etilgan pulli avtoturargohlar faoliyatiga taalluqlidir. Koʻp qavatli uylar oraligʻi, hovlilar va toʻxtab turish taqiqlanmagan boshqa bepul hududlarda avtomobil saqlash uchun hech qanday toʻlov yoki ruxsatnoma talab qilinmaydi.
"Rezidentlik ruxsatnomasi" nima va u kimlarga beriladi?
Ruxsatnoma bevosita yoʻl boʻyida pulli avtoturargoh tashkil etilgan koʻcha boʻylab joylashgan yoki ushbu zonaga yaqin joylashgan mahallada yashovchi fuqarolar (rezidentlar) uchun joriy etilmoqda. Maqsad — uyi oldida pulli toʻxtash joyi tashkil etilgan aholiga imtiyoz berish va ular oʻz mashinalarini joylashtirishda muammoga duch kelmasligini taʼminlashdir.
Rezidentlar uchun quyidagi imtiyozli shartlar amal qiladi:
— soat 20:00 dan 08:00 gacha boʻlgan vaqtda rezidentlar oʻz avtomobillarini pulli toʻxtash joylarida mutlaqo bepul joylashtirish huquqiga ega boʻladi;
— kunduzgi vaqtda (08:00 dan 20:00 gacha) foydalanish uchun soatbay emas, balki yiliga bir marta toʻlanadigan qatʼiy belgilangan toʻlov joriy etiladi;
—yillik toʻlov miqdori bazaviy hisoblash miqdorining 1 baravari miqdorida belgilangan boʻlib, bu oddiy tariflardan keskin arzon hisoblanadi.
Bitta turar joy (xonadon) manziliga koʻpi bilan 2 ta rezidentlik ruxsatnomasi rasmiylashtirilishi mumkin.
Ushbu yangi tartib-qoidalar 2026 yil 1 fevraldan kuchga kiradi.