"Li Auto" avtomashinalari reklamasida qonunbuzilishi aniqlandi
Oqibatda isteʼmolchilarda chalgʻituvchi tasavvur shakllangan va haqiqatga toʻgʻri kelmaydigan maʼlumotlar asosida qaror qabul qilish xavfi paydo boʻlgan.
“Yas-Petrolium Trade” MChJga (“Li Auto” avtomashinalari reklamasida) qonunbuzilish holati yuzasidan moliyaviy jarima qoʻllanildi. Bu haqda Raqobat qoʻmitasi xabar berdi.
Qoʻmitaning Namangan viloyati hududiy boshqarmasi tomonidan olib borilgan monitoringlar natijasida “Li Auto New Energy Vehicles” MChJ faoliyatida reklama qonunchiligi talablariga rioya etilmaslik holati aniqlandi.
Xususan, kompaniyaning rasmiy telegram kanali va instagram sahifasida “Li Auto” ni rasmiy dileri ekanligi boʻyicha yolgʻon va chalgʻituvchi reklamalar joylashtirilganligi aniqlandi.
Buning natijasida isteʼmolchilarda chalgʻituvchi tasavvur shakllangan va haqiqatga toʻgʻri kelmaydigan maʼlumotlar asosida qaror qabul qilish ehtimoli vujudga kelgan.
Yuqoridagi holatlar yuzasidan Namangan viloyati hududiy boshqarmasining Maxsus komissiyasi tomonidan “Yas-Petrolium Trade” MChJga nisbatan “Reklama toʻgʻrisida”gi Qonunning tegishli moddalari talablari buzilishi yuzasidan ish qoʻzgʻatilib, ishni koʻrib chiqish yakunlari boʻyicha moliyaviy jarima qoʻllash yuzasidan qaror qabul qilindi.
Shuningdek, qonunbuzilish holatini bartaraf etish va kelgusida yoʻl qoʻymaslik yuzasidan koʻrsatma berildi.