Nukusda soxta bank xodimi qoʻlga olindi
U ikki fuqaroga jami 1,5 mlrd soʻm imtiyozli kredit mablagʻlarini ajratib berishini aytgan.
Nukus shahrida fuqarolarga imtiyozli kredit olib berishni vaʼda qilgan firibgar ushlandi.
Bosh prokuratura huzuridagi Departamentining Qoraqalpogʻiston Respublikasi boshqarmasi hamda boshqa huquqni muhofaza qiluvchi organ xodimlari hamkorligida tezkor tadbir oʻtkazilgan.
Unda fuqaro H.K. (muqaddam firibgarlik jinoyati uchun sudlangan) 2 nafar fuqaroga oʻzini goʻyoki bank xodimi sifatida tanishtirib, Toshkent shahrida ishlaydigan tanishlari yordamida fuqaro I.T.ga 1,2 mlrd soʻm va fuqaro M.B.ga 300 mln soʻm imtiyozli kredit mablagʻlarini ajratib berishini aytgan. Evaziga jami 48,4 mln soʻmni olgan vaqtida ashyoviy dalillar bilan ushlangan.
Mazkur holat yuzasidan Jinoyat kodeksining 168-moddasi (firibgarlik) va 28, 211-moddasi (pora berish) bilan jinoyat ishi qoʻzgʻatilib, tergov harakatlari oʻtkazilmoqda.